عتـــــــاب عـاطــل للشـاعر/ســعيد بن مـانـع

الهمّ ضيّق خاطري ولا جداي الا الغنا **
حتى الغنا لك الله انه يزيد ضيقي والحزن

واللي تعنى واجتهد يبغا الجنا وين الجنا **
خمسة غروس اسقيتها بيدي ولكن ما أثمرن

ما أغير اناظرها عسى تثمر وتجلب لي الهنا **
تعبت عيوني وابطت غروسي وانا بشكي لمن ؟

ياموطني يالموطن اللي ماعرف مجدك فنا **
خيرك وصل اقصى البلاد العالميه والمدن

ياموطني انا هناانا هنا انا هنا **
شبحك ألما بعد الحظن ينسيك من وسط الحظن ؟

ياموطني ظّلم عليّ الوقت .. وأتحرّى السنا **
ويزيد في عمري زمن ويروح من عمري زمن

ابغى ارضي الشيبان وارضي خاطري بشوف الظنا
لكن ماباليد حيلة آآآهـ... ياشين الغبن

طقيت باب الرزق لكن مافتح والله لنا **
كنه يقول : السير يافهمان لازم يندهن

طقيت باب الرزق لكن مافتح والله لنا **
كنه يقول : افلح وجب لك واسطه ولا استكن

قلت اشهد ان لي واسطه والواسطه يابو جنا **
حب الوطن والروح في حب الوطن تدفع ثمن

افديه وآقف درع قدام الهنادي والقنا **
ولو تركني فالمحن ؟ فلا تركته فالمحن

فقير ماشفت الغنا مآني من عيال الغنا **
لكن اذا نآدى الوطن ؟ اتسلف ريال الكفن

أثور من دونه وانا سعودي وانا طيّب جنا **
منهووو يشكك في ولائي فالسريره والعلن

ياموطني .. هذا عتاب أحباب .. جعل اللي شنا ؟ **
يلقى البليه والمصيبه والمهونه والوهن

خمس اسنواتٍ عشتها عاطل ولا هو بس أنا **
كم فيه من عاطل بوسط الوقت همّش واندفن

نلت الشهاده والفرح برقه سبق رعد العنا **
هذي الشهاده ياوطن وين الوظيفه يا وطن ؟؟