قصة القصاص

القصة غريبة عجيبة اسمعها00000
سلطان بن رباح له خوي يسمى محمد بن عقيل كان جامعتهم خوة الدنيا منذ الصغر على عز ومعزة كبروا تزوج سلطان وجاله ولد وسماه على اسم خويه محمد من زود مايغليه كانوا يحبون المقانيص ....هنا بدأت القصة الفعلية طلعوا للبر الاثنين مامعهم ثالث ، وبعد صلاة الظهر محمد يسوي الغداء وسلطان ينظف السلاح كان فيه طلقة في السلاح مادرى عنها سلطان في المخزنة ضغط الزناد وثارت البندق وجات في خويه ومات ،،،، أخذ خويه وسلم نفسه وبدأ المشايخ والمصلحين يتوافدون على أهل محمد أنهم يتنازلون عن سلطان لكن للأسف وصلت الدية إلى عشرة مليون ورفضوا إلا رأس برأس صدر الحكم على سلطان بالقصاص ؛؛؛؛ لكن الصدفة كان قبر سلطان جنب قبر محمد أخوان في الدنيا جيران في القبور000000000000
واسمعوا الآن القصيدة 000000000000
يافلاح الهم خيم فوق قلبي يافلاح ***** كيف تبغاني أسولف وأنت خابرني عليل
ويش قولك في عليل في حياته ما استراح ***** تنتثر دمعة عيونه لأظلم الليل الطويل
حالته لا ما تباعد حال سلطان الرباح ***** بالخطا راحت حياته والخطا ماله بتيل
كان ويا صاحبه اثنين في أرض براح ***** يطردون الصيددائم من صبح لين المقيل
اجمعتهم صحبة الدنيا على جد ومزاح ***** مايهابون الليالي والحمول اللي تميل
ماقتل عامد ولكن ثور إبليس السلاح ***** بالخطا ثار السلاح وين يلقى له دليل
وانعقد كتنه وربعه تنتظر فك السراح ***** والأكيد إنه سجين ومارضوا ربع القتيل
هل دمعه يوم صلى ركعتين فالصباح ***** في نهار الجمعة اللي من ثقيل في ثقيل
هلل وكبر ونفسه تذكر اللي راح راح ***** كان في ربعه عزيز وذله الوقت الذليل
لامحمد لا تهاني لا سعود ولا صلاح ***** كلهم كانوا على باله وهمه في هديل
طفلة ماكملت عامين صايبها كساح ***** وانتثر دمعه وحالها من سبايبها نحيل
حان تنفيذ القصاص وغطوا الرأس بوشاح ***** وجاك سيافه يشيل السيف أبوحد صقيل
ارتخى رأسه وزاد الموقف الحامي صياح ***** بين نوح وبين دمع وبين صيحات وعويل
وارتفع صوت الحشود وزاده محمد وصاح ***** يايبه تكفى دخيلك تستمع قول الدخيل
يايبه وشلون نصبر كيف نهجع بارتياح ***** وأنت من دنيا عيالك ماخذك مر الرحيل
يامحمد هاك علمي واحفضه قبل المراح ***** انتبه لأخوانك وبالك عليهم لا تعيل
والله الله فالصلاة وفالصيا م وفالصلاح ***** والله الله فأمكم والله لكم بعدي كفيل
غمض عيونه ونفسه تطلب الله السماح ***** رافع سبابته مطلوب والله الوكيل
وسل سياف الصفا سيفه وطقه ثم طاح ***** رأس سلطان المراجل وانتثر دمه يسيل
غسلوه وكفنوه وفاح طيب السدر فاح ***** وبالمصادف صار قبره جنب قبر ابن العقيل
يافلاح الكارثه ماهي سوالف يافلاح ***** خلني ساكت ودور غير هالقصة بديل

ارتخى رأسه وزاد الموقف الحامي صياح ***** بين نوح وبين دمع وبين صيحات وعويل
وارتفع صوت الحشود وزاده محمد وصاح ***** يايبه تكفى دخيلك تستمع قول الدخيل





بيض الله وجهك يا أخوي
قصه مؤثره ومحزنه جدا

تقبل مروري



وليد العجيفي

نشكرك ياأخ وليد العجيفي على مرورك وتعليقك الجميل
وتقبل تحياتي وتقديري

\7