ديــوان الشاعر:ابراهيم السلمي

دنيا الغرام



غابت وغابت بسمة الحي والدار
حتى الليال اظلم بعيني قمرها

وتاهت بي دروب العنا والقدم سار
بالرحله اللي زاد جرحي سفرها

يمر في الوقت تايه ومحتار
ارقب عناوين الليال انتظرها

اناظر الساعه وادور لها اعذار
وانا اعرف اني دون عذر اعذرها

وفي معمعة حزني وتشويش الافكار
حسيت فيها قبل يلفي خبرها

جتني ودمع العين بالخد مدرار
مثل السحابه لاتناثر مطرها

تبكي من اسباب الزمان الذي جار
تشكي لياليها وتشكي دهرها

ضميتها وفي داخلي للوله نار
امسح دموع العين وامشط شعرها

قالت ترى جيتك وانا كلي اضرار
روحي تزايد في غيابك خطرها

قلت اصبري هذا النصيب الذي صار
كفي دموع العين وارضي قدرها

اللي حصل يابنت من ضمن الاقدار
ارجوك عينك لايطول سهرها

ردت وقالت لي ترى صبري انهار
مليت انا دنيا العذاب وبشرها

ماكنت احسب ان الهوى عدة اسرار
يصعب علي اعدها واحصرها

الا بعد ماطحت في وسط الاخطار
روحي سفينه واغرقت في بحرها

جاوبتها يابنت ماللهوى اعذار
دنيا الغرام العذر فيها كدرها

من قبلنا العشاق ذاقوا بها امرار
واحلى مقادير المحبه صورها

الصوره اللي رسمها ماله اطار
في وصفها الشعار تاخذ حذرها

الحب ماله رمز واوصاف وشعار
الا انه.. احساس القواعد كسرها

بالقلب تاثيره مثل نقش الاحجار
تبقى على مر الزمن في حجرها

حتى ولو جار الزمن فوقه ودار
ذكراه وسط القلب مازال اثرها

هذا وانا يالغاليه دمعي الحار
يذرف على الخدين حتى حفرها

مثل السجين اللي ورى حد الاسوار
خسر حياته والسعاده خسرها

ماعاد لي حيله على كل ماصار
وقت الحصاد الروح تخسر ثمرها

الحب يلعبٌي مثل لعب الاوتار
بايدين فنان خبير بوترها

والحال بيٌن للشواهد والانظار
مايجهل الحالات منهو نظرها

تعبت ازيف ضحكتي والعب ادوار
اكتم جروح الروح واخفي قهرها

خلاص ابعلن قصتي عبر الاقمار
واقولها في كلمتين اختصرها

الحب مشكلتي وانا مارضى الاشوار
باللي ملك دنياي حتى دمرها

والحب كذبه واصدقه مثل الاسحار
والروح في دنياي هذا قدرها
[/size][/font][/align]