سفر الدغيلبي وصقر سليم

هذه المحاورة في حفل الاستاذ/ طارق الشكري السلمي
اترككم مع الطاروق

سفر الدغيلبي
سلام والتاخير وأحكام الظروف = ماهيب مقصوده ولامتعمده
من عصر وأنا في المطار أسعى وأطوف = والله ماكني مواطن في بلده

صقر سليم
يامرحبابك وأنت ضيف من الضيوف = لو كان جاله ظرف ماهو في يده
أمّا الخطوط نظامها شي معروف = لكن عادي وأشكر الله وأحمده

سفر الدغيلبي
ياصقر صرت وحيد من بين الصفوف = من تحت مزنٍ يفجع القلب رعده
أمّا تحمل قوّ مضراب السيوف = ولا منامٍ فوق حيد المسنده

صقر سليم
لاوالله الا ماعليه منك خوف = واللي زرعته في زمانك تحصده
هذا سفر محتاج له وزنة بلوف = حتى يعد الخط قدمه وبعده

سفر الدغيلبي
ماأنت أول اللي مات من كثر الحسوف = قبلك فلان نحدره ونسنده
سفر من سباعِ تحوف القوم حوف = ولا البقيلي راقدٍ في مرقده

صقر سليم
ماتلحق الشكات ياكود الضعوف =وأنت تجيب علوم غير موكده
المشكله قلبك كبر راس الخروف = واللي يبا ذبحتك يبشر بسعده

سفر الدغيلبي
وصاك أبوك وصيةٍ بأربع حروف = والعود طيب والمصيبه في ولده
سليم ربعك صفقولك بالكفوف = خذ وحده مني وباقي وحده

صقر سليم
وأنت ولد عودٍ يبى منك مخلوف = لكن عاقبته وضيعت جهده
ربعك عتيبه طبلولك بالدفوف = لو انها بالانقراض مهدده

سفر الدغيلبي
حاولت أوصف صقر معدوم الوصوف = بقيليٍ مقرود والله يقرده
عتيبه أخذوها جبر وانته تشوف = لاتجحد اللي طوعك لاتجحده

صقر سليم
اما انت في التوصيف ماتبغى كلوف = دغيلبيٍ في المياه الراكده

تبا تحذف الناس وأمسيت محذوف = ودك تسابق واليدين مقيده

اذا كان يوجد نقص فالمعذرة
تقبلوا تحياتي