ديوان ( همـس السلسبـيـل )

اليتيمة

من سحاب أفكار شاعر . كنز الابيات الحكيمة
استهلت غيثها يروي عطش من هو سمعها

النوايا البيض تشبه همسة الفجر ونسيمه
عطرها الفوّاح له بصمة على الخافق طبعها

والدموع اللي لها في خافقي حشمة وقيمة
تشبه جنيهات شايب من صغر سنه جمعها

التجارب علمتني . (كل دقة بتعليمة )
والحياة دروس والدنيا كفانا الله طمعها

حالتي حالة طفل مطنوخ تصميم وعزيمة
يضرب الكايد بكف لغير ربه مارفعها

بطشناماله حدود أسودمانرضى الهزيمة
ماانحنى راسي لغير الله في ركعة ركعها

كلمايزرع فؤادي وصل . والنية سليمة
يحصد أشواك الخيانة والغدر والغش معها

وكلما يعفو ويصفح جاه طعنة في صميمة
وكلما يبني جسور الخير قال الحظ دعها

من براكين المواجع ينتثردمع اليتيمة
استباحت دولة الصبر الجميل بمجتمعها

تكسر الخاطر قلوب . تصافح أيادي لئيمة
مالها حيلة . وطوفان المصايب يقتلعها

العيون اغرورقت . تستفزع قلوبٍ رحيمة
واجمل اللحظات تنزف خوف مايهدا فزعها

كلما انظر في عيون الكون والناس الحليمة
اكتشف نظرةْ عتب بعيونها . العالم زرعها

صرت اراعيها واحَصّنهاواناديها عظيمة
واتوارى عن سوالفها واسافر مع ورعها

يعتصر لفراقها قلبي وطعنتها أليمة
اشغلتني بين بسمتها وقسوتها ودلعها

الحكاية حركت في داخلي ذكرى قديمة
الجروح اللي تحت سابع ثرى دافن جزعها

في ملامح حد سيف الحاسد آثار الجريمة
لو على كيفه جسدك العافية منه انتزعها

ولوعلى كيفه حذفك مع الشياطين الرجيمة
ولو بكيفه رحمة الرحمن لو يقدر منعها