ديوان الشاعر حمدان بن عامر الشكري (ابن مقحــص)

تعيش فالدنيا على كثر ماتعيش)
==================

تعيش فالدنيا على كثر ماتعيش
تبي تغادرها ولا فيه تشكيك

لكن أخذ حذرك من الغي والطيش
وهرجٍ بخلق الله وعلمٍ يزريك

ولاتغرك الدنيا بحلو المفاريش...
لو دامت لغيرك فلايمكن اتجيك

وعلى عباد الله لاتنفش الريش
الناس ماخلقوا عبيدٍ مماليك

ولاتقول انا عارف وغيري دراويش
ترى الرجال ابها رياجيل تفحيك

خل التواضع لك سمه واضحك واعيش
واعمل عمل يوم القيامه ينجيك

واكسب من اللي تكسبه بالمطاريش
لكن لاتنسيك منهو يواليك

ولاتفشي اسرارالقريبين وتطيش
عند البعيد ولو قريبك معاديك

ولاتغتر بنفسك وكثر المحاويش
ترى الغنا نفسٍ عن الذل تغنيك

ولاصرت لانخوه ولاراسك ايشيش
ولامجلسٍ فيه الرياجيل تلفيك

تعيش فالدنيا على كثر ماتعيش
تبي تغادرها ولاحدٍ براجيك
[/poem]

أحدٍ يبي لندن وباريس وجنيف = واحدٍ يبي يم النفود يتمشى
واحــدٍ يصــارع مــوجة البــرد والـصيف = ولــــيــا تغــــدى مــــرةٍ مـــاتعـــــشى
واحدٍ بوده يكرم الجار والضيف = لوكان بالدين المهين يتغشى
ويســوق له دلـــه معــباه بالكـــيف = والعود الازرق وسط بيته تنشى
واحدٍ يبها بس ماجت على الكيف = يرضى بها والا علاها يمشى
واحدٍ منشف كبده الفقر والحيف = يصحى بها مره ومره يغشى
واحدٍ غني لكنه يخـــايل الطـــيف = وليا قلط على الكرامات عشى
واحدٍ مقاضيبه مثل قضبة السيف = سيفٍ على رقاب الاعادي يمشى
واحدٍ على ربعه كما العالي النيف = والاكما وبلٍ من المزن رشى
واحدٍ كريم أسبال شهمٍ مثل هيف = رجلٍ على طيب المكارم تنشى
واحدٍ ردي أبخيل ما يكرم الضيف = وايضاً بشرهات الخلايق تغشى
ماعنده ألا الكذب والحكي والزيف = بها مابين الخلق قام إيتحشى
دنيا تشكل ماعرفنا لها كيف = أحدٍ بها عشّى واحد ما تعشى

( ودي سهر )

ودي سهر ليلي وصبحي واشوفك
واقول ياًوجه السعد فالي الخير

واقراك في صمتي واردد حروفك
على لحن وانغام تغريدت الطير

واكتبك وارسملك غلا في كفوفك
واقول لك بالانجليزيّ / كمهير

تعال وعيوني بحر لايطوفك
سيربها من حيث ماودك تسير

وان كان تسمعني وتسمح ظروفك
هي كلمتين اقولها لك ولاغير

اغليك واحبك غلاي لطيوفك
واواصل بدربي على رحلة السير

واكسر جمود الحب واجتاح خوفك
واصبحك يومي وامسيك بالخير

{يااحمد }

يااحمد ابنصح عن خوة النذل الهدان
خوته ماهي بمكسب ولاهي راس مال

جنبه واحذر تخاويه في عرض الزمان
خوة الانذال نقصٍ (ن )عليك بكل حال

وانتبه من صاحب المصلحه حلو اللسان
واحدٍ لامن قضى لازمه ماعنك سال

لاتعده لك خويٍ بالخفا والا البيان
ولا تعده لك رفيق إيحمل عنك الثقال

خاو رجلٍ خوته بالعنان وبالسنان
عنك ما يبخل بجاهه وحاله والحلال

رجل لامنك نخيته صهل مثل الحصان
محزمك لحدك الوقت والا الحمل مال

اخذها مني نصيحه وشي من البيان
تجربة رجلٍ عرف شكل وانواع الرجال

( الرفيق )

والله إني رفيق الطيب الوافي
أفتخربه وأماريبه على الشده

إن بغاني لقيني مشربي صافي
وإن بغيته عليّ إيمينه إيمده

هو عضيدي وانا له ستره الضافي
يحتزم بي وهو لي محزم آعده

يحتمي واجبه في كل ميقافي
واحتمي واجبه لن غاب واسده

والردي والملون ذكره الخافي
جعله يتوب والا وقته إيحده

وإن تردى الرفيق أقول ياكافي
يالله إني دخيلك من هل الرده

والرفيق القدير الطيب الوافي
والله إني فداه بساعة الشده

من جروح الوقت والظلم الدفين
شب في قلبي فتيله واحترق

انثر الآلام وانفاس الحنين
بين ديواني وطيات الورق

واحسب الايام واعد السنين
واتخيل صبح يومه ماشرق

واترجى وقتي القاسي يلين
واتأمل حلم والحلم أنسرق

ه

( البارحه للفكر والشعر داعيه )

البارحه للفكر والشعر داعيه
حتى السهرمعها تظامن وأيّيد

والهاجس من الصبح للليل ناويه
في بحر شعري والقوافي مقيّد

لجل الذي لاحل ذكره و طاريه
أستأنس بطرايه و أفرح واعيّد

من شانه أكتب به قصيدي وانقيه
ولياكتبت الشعر فيه آتسيّد

أقدره واغليه واحفظ مباديه
حب ووفا له في سجله تقيّد

ولو أبتعدت وغبت ماني بناسيه
بالحب له قصرٍ بقلبي مشيّد

هذا دواء قلبي وبلسم عراويه
أنشهد إنه بالمحبه تسيّد

وإن غاب عن عيني وزلت حراويه
اقلق واخاف الوضع ماهو بجيّد

وانا عليه اخشى واعزه واداريه
وليا فرح واستانس أفرح واعيّد

( الرجل )


الرجل من يحفظ حقوق الرياجيل
ويدرك سلوم اهل السلوم الجليله

وليا ورد مايارد الا على النيل
يشرب قراح الماء ويترك نثيله

ولياذبح مايذبح ألا من الحيل
مايذبح المترديه والنفيله

ويسوق صفرٍ ماهي انحاس واستيل
ابهارها هيلٍ ماهي زنجبيله

وليا هرج هرجه دوا للمغاليل
هرجٍ يكفي عن كثيره قليله

ولايسمع القايل ولايتبع القيل
ويمد مدات الرجال الجزيله

ويرفع مقامه بين كل المشاكيل
وكرامة الرجال ترك الهزيله

والناس في حكم القدر والتساهيل
والعاقل العارف ماييغى دليله

وإن كان بعض الهرج يحتاج تحليل
يشب فالبارود راس الفتيله

ننظر بعين الواقع لصفوة الجيل
اللي مباديهم مبادي فضيله

والا البعض منهم مثل غثوة السيل
ودك ماتعرف وش وراه وحصيله

إن جاك والا راح ما يعدل الميل
ضيم وخساره في حساب القبيله

لوكان من زوله زهته المخاييل
حرام مايرقى الرجوم الطويله

والطيب يحمل في صدور الرياجيل
والا الردي مايحمل الا الفشيله

والطيب طيب ولا يجي فيه تبديل
ما ينشرى والا يحايل بحيله

الصدر ضايق والمشاعر حزينه
والشعر غايب والهجوس محبوسه

والشوق فيني والبحر والمدينه
والفكر جن الشعر عنه محروسه

شاطي بحر مركب غرام وسفينه
والموج عاتي والرياح معكوسه

==============

الله هو اللي لاعطا شي ما من
والناس لو تعطيك شيٍ تمنه

لكن بالله أتكل واحسن الظن
واللي توكل به فلا خاب طنه