المـــــــــربعــــانيـــه

صباحـ / مساء الخير للجميع

متواضعه جديده سوف اتركها لديكم هنا ريثما أعود

فرجائي ان ترحموها من سهام نقدكم


يا سِعد من مثلي وطت رجله على حزم الجذيب

والمربعانيه لفت يمّه تسوق رحالها


جابت فلول البرد والنسناس والمزن المصيب

وبلِ يسر العين شوفه لا بدأ همّالها


وأنا سعيد البخت يا خالد ومحظوظ النصيب

من غير موعد جاتني يافرحتي بوصالها


قالت يا وجه الخير ذا حالي معك صبح ومغيب

جوّي كذا فالديره اللي طيّب الله فالها


أغيب وارجع واتقهواها كما شرب الحليب

وارتاح حين انصب خيامي في علو جبالها


ما انساك يا دار الوفاء دايم فؤادي لك قريب

محبتك في داخلي وثّقتها بحبالها


يالله يارب النوامي يا سميع ويا مجيب

يا عالمِ كل الأماني دقّها وجلالها


ياللي عليك المتّكل فالأمر الأقصى والقريب

تسقي ديار سليم ربعي سهلها وتلالها


وأنّك تتمم طلعتي بالخير والجلسه تطيب

مابين شّب النار والسمره وكيف دلالها


مع خوةِ نشري مجالسهم بلا شكِ وريب

وأهل الصفا والطيب لابد الرجل يسعى لها

وسلامتــــــــــــــــكم


أحمد النجاري السلمي ( هاوي الود )
أبو خالــــــد