عهــد الهـــوى

كافي طمع خلّك سفير القناعه
نظرت عيوني في عيونك تكفّيك

قلت الرجى تبقين لو ربع ساعه
عشان حب القلب ودّه يوافيك

قالت وضعت الروح عندك وداعه
يمكن يكون اليوم آخر لقى فيك

وإن حل موتي يامنى الروح راعه
عهد الهوى صونه عسى الله يعافيك

بالذات حين تظيق فيك الوساعه
بالحيل يوم إن الفرح في مرافيك

اذكر غرامِ كنت مصدر شعاعه
رغم الجفا منّك مافكّر يجافيك

إن جيت تآمر قال سمعِ وطاعه
ولن جيت تنهى قال من عين وافيك

التضحيه زود العطا من طباعه
صدق المشاعر منه ماظن خافيك

لجلك ثمين العمر برخيص باعه
فدوى المكان اللي شراه بخوافيك

أودعك والقلب تغشاه راعه
خوفي يجي باكر وتبكي فيافيك

ودعتها والحزن مسدل شراعه
والدمع يصرخ يا عنا البوح كافيك

صحيت وإنه حلم كله فظاعه
كساني ثوب الهم ويقول ضافيك