طيور شلوووووى

السلام عليكم ورحمة الله وبركاته
مساء الخير وصباح الخير متواضعه
عساها تجمل ناظمها

إحذر صديق إن حال به حول ينساك
تراه راعي مصلحه وش تبابه

راعي نظاره وإن قنع منك خلاك
وطبع الحصاني ماتخاوي الذيابه

وإحذر تظيف اللي ليا جيت يشناك
ومن لايحسبك لاتحسب حسابه

تلقاه عابس وأنت مبلج محياك
موصي عياله مايفكون بابه

ماهو جليسٍ لك ولا من حلاياك
في مجلسه تلقى الطفش والكأبه

مايدري إنه لو تجمل وعشاك
ربي يعوضه مانقص من زهابه

ولو مر بك في درب راح وتعداك
مايدري إنك ماتبي من جرابه

(عيه) يدور عثرتك وإيتبلواك
مافيه درب من الردى مامشابه

وعليك باللي يعتزي عند ملفاك
مطلق حجاجه شيخ حضرة جنابه

له مجلسٍ ماينشرب فيه تنباك
ماغير عود أزرق ضيوفه حسابه

مجلس يشوقك مجلسك فيه يزهاك
والكيف جوفه يطربك في شراااابه

شيخ لعشيره لاوعدك يتحراك
الله جعل له عند خلقه مهابه

قدام تزهم راعي البيت ينصاك
ويقول قلط فالسعه والرحابه

وفنجال بريه يسوقه ليمناك
وتشبه تراحيبه ب نو السحابه

ومن بعد ساعه قلطك فوق مقراك
أنا أشهد أن طيور شلوى تشابه

ويدرج معك في خطوته عند ممشاك
بابه مشرع ما قفل يوم بابه

وعز الله أن الرجل لاجاك عناك
والظفر حطه فوق راسك عصابه

ويالمستمع كل المشاكيل شرواك
العلم جبته لك وأبرهن صوابه

( بقلمي)
نفاع الربيقي