تجاوبا مع قصيدة خالد الحربي

هيضتني قصيدة الشاعر خالد الحربي

وحاولت ان اجاريها في هذه الابيات المتواضعه


اتمنى ان تنال رضى الجميع


ياخالد الحربي ومسيت بالخير
لك من زعيم الشعر مبدا سلامه

سلام ياروس الرجال المناعير
اهل الوفا والمرجله والشهامه

ياشيخ حرب ويامضيف المسايير
ياراعي الجزلات شعر وكرامه

ياللي بدعت القاف ضد المعاثير
اهل العقول البائسه والرخامه

ناس ضعاف نفوس دايم مثابير
بالفعل دايم في ردى وانهزامه

مدمرين الشعر والفكر تدمير
منهم حروف الشعر تبكي ندامه

ضاعت مذاهبهم سواة المعاصير
اللي جنوب الدار واللي في شامه

هم يحسبون ان الشعر سوق للطير
يلقى به المحتاج لو الحمامه

عاثوا ولعبوا فيه من دون تقصير
حتى اختلف شعر العرب في نظامه

واحدهم اليا قام من نومه عصير
ماودك الا انه يكمل منامه

حيث انهم شلة فلس بالتفاكير
ابصارهم عميا والاريا غشامه

لو يملكون المال واغلى الدنانير
واحلى المظاهر والصور والوسامه

مايفرقون الابل عن جملة العير
ولا يعرفون الضوح ولى الغمامه

وش جابهم للشعر ورد ومصادير
اهل العقول الخاويه والسقامه

اهل الحكي والنمنمه والثراثير
يكشف ضعيف الراي مبدا كلامه

ياقدرة الله وش بعد باقي يصير
دام التراث اليوم ماله قوامه

واول زمانه مثل حد المناشير
ما يقربه راع الردى والهلامه

واليوم حده مثل حد المناقير
كل تطاول بالشعر لين ضامه

لين ان صاب الشعر حمى الخنازير
من فعلهم فاقد حلا الابتسامه

عزاه ياشعر غدا مثل الاسير
في يدين قوم كسروا له عظامه

تشكي حروفه مثل شكوى المعاسير
ضاقت بهم دنيا الفلس والندامه

متى على الله ياصدوف المقادير
يرجع لنا شعر العرب في نظامه

ونلبسه ثوب الفرح والتباشير
ونصبه شيخ ويلبس عمامه

شيخ ينصب بين كل المناعير
اهل الشعر واهل الوفا والفهامه

مقدرين الشعر والحرف تقدير
الشعر يلقى في طرفهم مقامه

هذا وانا ماقول بالكل تقصير
كل على ماقيل يكرب حزامه

ونهاية المشوار تبدا المشاوير
والله ولي الناس يوم القيامه





تحياتي للجميع


اخوكم


ابراهيم السلمي