قصيدة رثا لاخ فقد اخوانه الاثنين وبقي وحيد

بسم الله الرحمن الرحيم

السلام عليكم ورحمة الله وبركاته

رثا من الشاعر مرشود بن وصل الله البنوي في اخويه رحمهم الله
الشاعر راشد بن وصل الله و الشاعر رويشد بن وصل الله

رحمت الله عليهم واسكنهم فسيح جناته وكتب لاخيهم الصبر على فراقهم

واونتي ونت كسير العظامي..فالمعركه صابوه تسعين رامي ..
دروبه اللي يغرقون الليامي..واقفو بعد قظوه للموت الأنذال ..

واون ونت من شلع ساقه الداب ..ساري بليل وتالي الليل منصاب..
بارضن خليه لاتوفي ولاطاب..مالك عن المكتوب ياالعبد محوال
واون ونت من وراء الباب محجوز..يرجي ويسترحم على الناس ملزوز..
لوقاسي الزندين يجفل من الهوز..روحه رهينه بين محيي وقتال..
أونها والدمع مغرق عيوني ..واسبح كما اللي فالبحر يسبحوني ..
في غبته والموج سدي ودوني..بعد المراسل منقطع كل الإرسال..
مالوم عينا دمعها يذرف اذراف..دمعك شرف ياعين تبكين الأشراف..
كاسبه الناموس في كل ميقاف..والله صدق من قال في كل ماقال..
يشهد لهم ربي وكل القبائل ..لن خيلت بخيال كل المخايل ..
كلآ يطالع لثنين الأصايل ..يشهد على ميقافهم كل رجال..
ابكي على اللي يكسبون الجميله ..اخواني اللي من خيار القبيله..
اللي ليا خيل علينا مخيله ..دون القبيله حولو درع وظلال..
معوظين بخير ياذي بنيه ..الله يعوضكم ويخلف عليه ..
يخلف عليه فالسبال النقيه ..أهل الجميل معبره كل مكيال ..
ياكاتب أكتب لي من الشعر بيتين ..تحيته تضفي على كل الأخوين ..
أخواني اللي ودعوني بالأثنين..ياليتني معهم عن الدار رحال ..
بعد الغلا ومجالسه كل غالي..خلتني الدنيا وحيدن لحالي ..
الا يابيناخيي والا ياعيالي ..ميل علينا الوقت والوقت ميال ..
أنتم تراكم من منازل رفيعه ..نصبر ولو ضاقت علينا الوسيعه ..
ردات ربي لإبن آدم سريعه ..نصبر على المكتوب والهم ينزال ..
دنياك لوتمشي معك ماتصافيك ..لو انها تصنع جواهر وتعطيك..
تسقيك من شرب الحلا لين ترويك ..وتسقيك من شرب الدجا كم فنجال..
ياالله ياعالم خفيات الاسرار..تفرج هموم اللي على الهم صبار..
ياخالق الجنه وياخالق النار..تكتب لهم في جنه الخلد منزال..
أدعي لهم من قلب صافي ونيه..أدعيلهم واجبهم اللي عليه..
لعلهم في الجنه الناعميه..في جنه الفردوس مع حسن الاعمال..
راضي بحكم مدبرالكون راضي..سبحان من يحكم على كل قاضي..
أصبر ولوالصبرمتعب وعاظي..تنزف جروح القلب والدمع همال..
يامرسلي ود الخبر لي وده..ودة لمن هو يحفظ السر سده..
اللي يشرف ماقفه دون حده..في مجلس مافيه للهرج نقال..
سلم عليه وعلمه بالحقيقه..يبذلك المجهود بأحسن طريقه..
وعلاقته مع كل طيب وثيقه..حامد معيوض شيخنا طيب الفال..
حامدكما ضلعا يسمونه النير..والضلع تكهب في ذراه العصافير..
عنداللوازم مايحسب المخاسير..لعل يفدونه من العالم اجيال ..
تم الكلام وحزن مرشود باقي ..باقي بقلبه لانهار التلاقي ..
نهار تعلن جائزه كل شاقي ..ويحاسبونه عن خفيفات وثقال ..

اتمنى دعائكم لهم بالرحمه والمغفره