& عجب !!! وعتب &

بسم الله الرحمن الرحيم

[poem=font=",6,blue,normal,normal" bkcolor="transparent" bkimage="" border="double,3,red" type=2 line=1 align=center use=ex num="0,black""]
البارحة عيني شكت جفو الأجفان = وهجوس فكري بين روحه وجيّه
قمت اتفكر في تهاويل الأزمان = اللي تحيّر كل راعي رويّه
الوقت من طيبه كثر فيه فرسان = والكل منهم صار قائد سريّه
و الحق راح بضاعةٍ عند ديّان = اعطيك حق !! ترد حقي عليّه
والمصلحه صارت كتابٍ بعنوان = ومقدّمه على السلوم النقيّه
والصدق ما تلقاه لو بأغلا الأثمان = قليل من قوله على صدق نيّه
واللي معه مال ووجاهه وسلطان = محبوب لو ماله شداد ومطيّه
واللي من الأموال بالحيل فقران = تصعب ظروفه والليالي سنيّه
لوكان فارس خيل في كل ميدان = من بينهم ماله ابد قابليّه
وليا تفقدناك يا حال الأخوان = الكل منهم منتحي في نحيّه
والمشكله ما دام سقمك بالأعيان = طبّه صعيب وعلّته سرمديّه
الوضع ما يرضي وأنا منه زعلان = والعلم منصاه الرجال الوفيّه
لي شرهةٍ واشره بها فوق ظفران = ما اشره على قوم القلوب الرديّه
اللي تثورها على غير نيشان = ما همها غير الردى والزريّه
هذا ولي في الشعر قولٍ وبرهان = وشهودها من محتمين الحميّه
لي ربعةٍ وافخر بهم دوم شجعان = ما نارد إلا للعدود العذيّه
في نصرة المظلوم لو كان ما كان = دخيلنا ما يشتكي محقريّه
مزبان يزبن فيه لن جاه حقران = من بعد رب العرش زبن الرعيّه
والفخر ما هو عيب والأصل شيخان = مثل الجبال النايفات الرسيّه
يا هيه يا راكب مطيّه وعجلان = عليك بالهون المسافه قويّه
من لا بنا بنيه على جيد سيسان = ينهد بنيه بين صبح وعشيّه
لا صرت من بين المخاليق لك شان = ضحيتك منهو رصيده شويّه
لكن لا تنساه خلّاق الأكوان = اللي يجازي كل سيّه بسيّه
وليا عملت احسان يجزاك بأحسان = في الوحده عشره وفي العشر ميّه
نهار عرض اعمالنا فوق ميزان = لا شك كل الخلق ما هم سويّه
البعض منهم فاز والبعض خسران = والعلم كله عند رب البريّه
يالله يا منشي غزيرات الأمزان = يا عالمٍ بالصائبه والخطيّه
تلطف بحال النّاس بدوٍ وحضران = وتزيل عنهم فكرة العنصريّه
طالبك يالمعبود رحمه وغفران = قدام لا تضوي عليّ المنيّه
وختامها صلوا على خير انسان = نبينا المنقذ من الجاهليّه
[/poem]

ودمتم بخير

الاخ الشاعر / عبدالوالي


صح لسانك على القصيده الجزله

الشاعر " عبدالوالي سعد السلمي "

صح لسانك وبيض الله وجهك قصيده مكتمله شعراً

تقبل مروري المتواضع

اللهم اصلي وسلم على سيدنا محمد

الشاعر القدير/ عبد الوالي سعد السلمي

صح لسانك على هذه المعلقة والتي عانقت بها السماء

بما فيها من الجزالة والأبداع الحقيقي

حكم وموعظة ونصح وأعتزاز بالنفس

لله درك ثم لله درك

وننتظر جديدك بشقف

ولك خالص تحياتي وتقديري

قصيدة رائعة وتحمل العجب والعتب فعلا!!!!!!!!!

أتت في وقتها وحملت ما حملت !!!!!!

مع التحية إلى :

عبد الله المغيضي رئيس مجلس الإدارة

زكي السلمي المدير العام

حمدان بن مقحص مشرف الشعر الشعبي ( الشاعر والفارس)

الذين لهم فضل كبير في وجود الشعر والشعراء وإعطاء الفرصة للجميع

ودائما ..

يعجبني الشعر الذي يحمل رسالة قوية !!

القصيده اكثر من رائعه تحمل العديد من الرسائل المباشره والغير مباشره
التي تحتاج الئ من يفهما ويتقيد بها
تقبل مروري
اخوك عبدالرحمن بن عبدالرحيم العلوي

يعطيك العافيه اخي عبد الوالي
على هذه القصيده التي تحمل
الكثير بداخلها من معنى
لك كل الشكر
تسلم وصح لسانك

الشاعر القدير..عبدالوالي سعد السلمي

تطاوعك الحروف والقوافي مثل ماتريد

صح لسانك حتى البعث والنشور