بـــــــــــوح شـــــــــــــــــــاعر

بسم الله الرحمن الرحيم

[poem=font="simplified arabic,6,blue,normal,normal" bkcolor="burlywood" bkimage="" border="double,5,sienna" type=2 line=1 align=center use=sp num="0,black""]
في ليلة قمرا بها الجو دافي=والكيف قندته على شبة النار
في حزة اللي من سلى الهم غافي=أطلقت أنا بيديّ عنان الافكار
وراحت تجوب بكل قَفر وفيافي=وجتني بذكر اللي له سنين مازار
قالت لقيته فالسنين العجافي=اللي تسميها لك اليوم تذكار
قلت رحّبو باللي على الفكر لافي=ضيفٍ ولو ماشوفه بعين الابصار
في ليلة حلوه حلاها خُرافي=أشب له نار الفكر وأنظم أشعار
اليوم في وقتٍ به ألامن ظافي=راحت بفضل الله معه كل ألاخطار
كلٍ يقول أنا الوحيد السنافي=اللي يقود بمفرده جيش جرّار
والناس عنده ماعليها حسافي=من خالفه بالراي مثل العدو صار
يصيح لويمشي على الارض حافي=ويدسّ راسه لويجي عجّ وغبار
في نظرته كل الشواطئ مرافي=وكل الشجر ينبت رياحين وأزهار
ما أطلقت أنا ألاحكام هذي جِزافي=جربت كل الناس صافي وغدّار
وأعرف حزّة موقفي وإنصرافي=وعلى مقادير الزمن دوم صبّار
واقنع ولو رزقي بيومي كفافي=وأموت أنا ماتبع مقفي بالانظار
ولازعل ليا طار القطا من ظفافي=يرده لي صوت الثميدي ليا ثار
ماقل دل ولوّ ماشاب قافي=أخذ الكلام اللي تحطه لك شعار
إحذر يجي قولك لفعلك منافي=ويطيح قدرك عند وافين ألاشبار
ولاكل وقتك يارفيقي عوافي=ترى الحلا دايم يجي بعده أمرار
ودعت ظيفي بعد ماقال كافي=هذا الكلام اللي عليه أكتب إقرار
وصلاة ربي اللي عليها إعترافي=على محمد خير من بالقدم سار[/poem]

وســــــــــــــــــــــلامتكم