ماني معك ياسعود

ماني معك يا سعود فـِيما تقوله=وعندي على ما اقول حجة وبرهان
خضت البحر يا سعود عرضه وطوله=واخذت من جوفه لألئ و مرجان
أنته تقول المال ساس الرجولة=وأنا بقول انك بما قلت غلطان
كم مالكً للمال شانت فعوله=لا نافعٍ ربعه ولا جاه ضيفان
يعجبك هندامه وشكله وزوله=طاؤس والطاؤس ريشٍ وجنحان
بالهرج يسرج للمعارك خيوله=و ليا اختبرته فالميادين ما بان
وكم من فقيرٍ راس ماله ذلولة=عشابها الضيفان والذيب سرحان
و لا لد للي عن هواه نصحوله=ويقول رزقي عند خلاق الأمزان
يا اللي هواكم قاع ما اكثر نزوله=أنا هوايه قمة شانها شان
عسرٌ صعود الضلع سهلٍ نزوله=و اللي يهاب الضلع يسكن بقيعان
المرجلة يا سعود كسب البطولة=اللي لها يتعب طويلين الأيمان
نخوة وفزعة مع عيال الحمولة=و رحمة ضعيفن ينتظر منك الإحسان
وإكرام ضيف لو لفى بالليولة=والدين راس المرجلة يا كحيلان
والمسعد اللي والديينه دعوله=في برهم يجزى بجنة ورضوان
ابوك و أمك برهم ما تطوله=ولانته مكافيهم على مر الأزمان
لكن حاول في رضاهم تنوله=من قبل لا يجزيك ذخرك بنكران
عطيتك الموجز ونصّ المقولة=و بيتٍ من الحكمة عن ألفين ديوان
و اختم بذكر اللي عباده سعوله=من كل فج يسوقهم صدق الايمان
حجوا لبيته بالحرم وإلتجوله=وتمت مناسكهم و تمن الأركان
وصلاة ربي والسلام لـ رسوله=ما دامت الدنيا و دامن الأكون





فيه مشكلة في أيقونة تنسيق القصيدة