يازيــــاد هـــــات الجــــيـــب وأطــــو الفراشـــــي.. للشاعر سعود بن سعيد المرزوقي

[poem=font="simplified arabic,4,red,normal,normal" bkcolor="white" bkimage="" border="outset,4,gray" type=0 line=0 align=center use=ex num="0,black""]
يازياد هات الجيب وأطو الفراشـي=جيب ٍ جديد مجهـزه للمطاريـش
من صنع لكزس مابصنعه نقاشـي=مايركبه كـود القـروم المداغيـش
ماهوب لي مهدى ولاجاء بلاشـي=معادل ٍ مشراه مـع لقمـة العيـش
سقت الثمن من خدمتي في معاشـي=حشت الثمن من مكسبي للمحاويـش
مـن الوكالـه مشترينـه بكاشـي=حتيش لو كثر الثمن فيـه حتيـش
ريح الخواجه فالكنـب والقماشـي=مافـك بيبانـه مـرور التفاتيـش
أليـا زهمتـه للمواجيـب هاشـي=هوش الذياب اللي تحب العراميـش
بكره عليه الصبح يازيـاد ماشـي=قبل الشروق وقت حـل المغابيـش
بخيل برق ٍ في صـدوق المناشـي=غيم سماه وجاء لمزنه رشاريـش
شرقي حضن بين السهل والحشاشي=هي ديرتي لو يكثر البعد والطيـش
ربعي حموها فالسنيـن العطاشـي=يوم الفشق باقيٍ بروس النواتيـش
واليوم تحت الحكم والامن غاشـي=بل الكبود الضاميـات المعاطيـش
هم ٍ رحل مرواح سهـم المواشـي=مرواح طير ٍ فالهوى ينفض الريش
وشبيت ناري فالحطب والقشاشـي=في عبلة ٍ مـاداج فيهـا خفافيـش
وسويت دلـه والبهـار النجاشـي=لفنجال بن ٍ ينعش الـراس تنعيـش
وسجيت فكري بين وضحى وحاشي=عفر ٍ وبرهـا ساقـط ٍ للمناقيـش
وصارت همومي كلها في تلاشـي=وأليا نشدني واحد ٍ قلـت مافيـش[/poem]