الزوجه الثانيه(سعود الحافي)

مره حدث لى موقـفٍ يالرياجيـل
يوم قلت أبآخذ حرمة لي جديـده
ودى اغيّر يوم شفـت البهاذيـل
من ذا القديمه يوم صارت جليـده
من عقب ماشاروا عليّه مشاكيـل
قالوا تجوز خـل عنـك العنيـده
قلت ابشروا باللى يـرد المكاييـل
والصاع مدبولـن وفوقـه نقيـده
قالوا مـرادك عندنـا بالتساهيـل
انتـه تقـدم والمطالـب زهيـده
ثم قمت انفّش كشختى فوق واشيل
مثل الحصان اللى عزومه شديـده
ماهمنى لو صار بعض الاقاويـل
فى نفسى احفّز مواقـف سديـده
صمّلت بالنيه وعزمـت بالحيـل
وانـا اتطلـع للحيـاة السعيـده
خذنا الوعد والوقت لجل المقابيـل
عند الـذى ساكـن بـدارٍ بعيـده
جينا و حيونـا بذيـك الفناجيـل
قالوا نعرفك انـت راع القصيـده
قلنا نريد اللى رموشـه مضاليـل
على كتـاب الله محصـي عبيـده
قالـوا طلبكـم والـم يالحلاحيـل
بليا شروط وقـدم اللـى تريـده
لاجيت بعد اسبوع تلقى المعاميـل
واتحظـر المملـك ويـدك بإيـده
عودت مع دربى بذيـك المواويـل
ادعى الاهى كل ما ابنـى نشيـده
يوم جيت لعيالى لقيت التهاويـل
لقيـت قدامـى حرايـق وقـيـده
البيـت مقلـوب وفيـه الغرابيـل
وقدامى الحرمـه بيدهـا حديـده
قالت علومك وصلوها المراسيـل
اعلوم نبخصهـا وجتنـا وكيـده
قلت الخبر ملبوس بالقال والقيـل
ما هو صحيح اللى بلغكم مكيـده
معقول نرضى بالغناديـر تبديـل
لا لا ولا يمكن وانتـى الوحيـده
من بعدها والراى جالـه تحاويـل
ودى اتراجع مير كيـف الشريـده
حطيت نفسى فى ضروف ومشاكيل
ويش العمل ياهل الحلول المفيـده
مضى علي اسبوع مثل المهابيـل
والناس ترقب جيتى فـى وعيـده
فكرت واعطيت التفاكيـر تحليـل
أبغى اتخلص مير ما أبغى النقيده
زهمت باللى ودهـم بالتواصيـل
اهل العروس اللى خصاله فريـده
قلت العذر لو يمكم نفسى اتميـل
لكـن حدانـى حـادىٍ يالوليـده
يوم رحت للمشفى بقصد التحاليل
قالوا نتايجكـم هجدهـا هجيـده
حالتك صايبهـا كثيـر العلاعيـل
بالدم فيـروس ومشاكـل عديـده
لياك تعـرس دام بالـدم تشكيـل
حالك دمار وغيـر لايـق وريـده
اقنعتهـم بالشاطحـات المثاقيـل
قالوا هذا المقسـوم والله مريـده
خلصت واتخلصت من ذا المهازيل
وكلن رضا بمقسومه اللى حديـده