عبدالله عتقان مع فلاح القرقاح

فــــــــلاح الـــقـــرقـــاح
سلام تسليمةٍ يأمـر بهـا الأسـلام والديـن *** في حفل روس الشيوخ اللي لهم قدر ومهابـه
أكرب حزامك يأبن عتقان تصبح ثاني إثنيـن *** إن كان منته بذيب أشهـب تعشتـك الذيابـه


عــــبــــدالله عــتـــقـــان
يامرحبا ياهلا عند الرجـال اهـل القوانيـن *** أقولهـا ياولـد عمـي وأرحـب بالنيـابـه
أنتـه تنـادي وحنـا يالعبيـدي مستعـديـن *** أخيولنا جاهـزه والسيـف مصقـولٍ نصابـه


فــــــــلاح الـــقـــرقـــاح
خلـه يـرف العلـم لسليـم وألا للقحاطيـن *** حنا جبل والجبل مـن حـده الوقـت ألتوابـه
لابد من ساعةٍ يصفي بعدها الماء من الطيـن *** وإن وقعت في ظلال إفلان ماسلمـت ثيابـه


عــــبــــدالله عــتـــقـــان
عشنا عزيزين وأنتم مثلنا عشتـوا عزيزيـن *** واللي يقابل لنـا بالشـر مانحسـب حسابـه
طبعاً سمعت الحديث اللي جرى مابين شخصين *** أنا تغاربت وأنـت أتقـول مافيهـا غرابـه؟


فــــــــلاح الـــقـــرقـــاح
مازال فوق العمود المرتفع نخلـه وسيفيـن *** مالك ومال السـؤال اللـي يبلشـك بجوابـه
ياسر عرفات عاش ومات ماحـرر فلسطيـن *** الظاهر إن ماعلا إسرائيل من حضرت جنابـه


عــــبــــدالله عــتـــقـــان
أسليم في بدر فازوا وأقحطان بيـوم حطيـن *** يعني سوا بالفعايل لـو الأسمـاء ماتشابـه
أبشرك حتى أبو مازن طلـع ياليـل ياعيـن *** أجمع جيوش أقحطان ونادوا بيـوم الحرابـه


فــــــــلاح الـــقـــرقـــاح
ياليت في أسليم مثلك يأبيض الشارب ملاييـن *** أقل حاجـه يشبـون الحرايـق فـي شبابـه
إذا لطمنا الخشم ياطير شلوى تدمـع العيـن *** واللي يغر السنع تفرض على راسـه رقابـه


عــــبــــدالله عــتـــقـــان
والله يامحلا الشهاده من رياجيـلٍ سلاطيـن *** نأخذ وسام الفخر والعـز نكتـب فـي كتابـه
يابو محمد وراكم شيـخ فاقـد لـه بعاريـن *** مدري غدت مع قبيلة حرب وألا مـع عتابـه


فــــــــلاح الـــقـــرقـــاح
أنتم سلاحٍ يسد النوب بيـن الحيـن والحيـن *** وألا الرصاص المكاذب ماينومس من رمابـه
الخاسر اللي يدورهـا علـى وحـده وثنتيـن *** الله شديد العقـاب ورحمتـه تسبـق عقابـه


عــــبــــدالله عــتـــقـــان
ماهي غريبه إذا كبرت تلقـى لـك مصليـن *** أصل الغريبه إذا دورت طيـب مـع عصابـه
أمشي بدربي عدل ماني بلف إيسـار ويميـن *** اللـي يلفلـف ياقحطانـي ياويلـه ياعذابـه