الحب الزلال

الجو ماطر من ثمان سنين بالحب الزلال
من فضل ربي ومنّته سيلٍ هوانا وبردي


والعشق انا مالك رهانه لايجي حوله جدال
وأنا اشهد إنّ المركز الثاني نصيبك يابعدي


حتى لو إنّك فالزمان الأولي فزت بنزال
علمتني كيف الغرام أوصّله نجم الجدي


متى اجعل الفرحه تشع انوارها وسط المحال
وشلون اخلّي راية الولهان في قبظة يدي


كنت اتعلم منك درس الحب وأسلوب الدلال
حتى غدى لساني ماينطق غير معسول شّهدي


واليوم بعد الامس صارت شمسه بحكم الزوال
وين الغرابه لا سبق تلميذ دكتوره عدي


أقولها صادق ورب البيت مافيها مجال
أنا ملكت الكاس طول العمر ياسرّ سعدي


اللي جعل روحه تعلّت فوق محبوبه ظلال
تحميه من شمس الظروف القاسيه وحرّ الغدي


أصبح متيّم بالهوى ساكن على ضفاف الهبال
زوّار مرباعه وفود الشوق مافيهم ردي


في كل لحظه يشعل الطاروق من شان الوصال
خلّى صفوف الملعبه بسمات عاشق مبتدي


مع الزمن عشقه كبر واصبح مرادف للخِيّال
يقول منهو قيس والّا عنتره عند أحمدي


أكيد مادامه كذا وحبّه نضالٍ في نضال
أبسط هديه بيرق العشاق يهداله هدي


بالله عليك أحكم بقانونك ي مزيون الخصال
العدل دستورك أعرفه ساكن القلب الندي