آلُآًميـُرْ :{ بدر بن عبد المحسن } / مُهَنْدِسْ آلكًلٍمَةُ ,,

#1 04-13-2009, 03:29 AM

شــآعر ..
بـ إبدآعه ..
وفنـــه ..
وسحر قلمـــه ..
آجبرني بآن آتبع مسيرته وآقرآء قصآئده بتمعُن..
لـ هذآ ....
آحببت آن آملي لكم شغفي في سطــِـِـور ..

من آبدع وآروع وآكبر آلشعرآء في آلمملكه وآلخليج وآلعآلم آلعربي ../

.
.
.
.
.
.

آلآميــر : [ بدر بن عبد آلمحسن ] ..

//

بدر بن عبد المحسن بن عبد العزيز من مواليد مدينة الرياض في 2 ابريل عام 1949، و هو الإبن الثاني لصاحب السمو الملكي الأمير عبد المحسن بن عبد العزيز - رحمه الله - .
تولى والده سمو الأمير عبد المحسن بن عبد العزيز إمارة المدينة المنورة في ربيع الثاني عام 1385 هـ، وخطت المدينة في عهده خطوات واسعة نحو التقدم والتوسع العمراني، وكان لين الجانب لأهل المدينة، حريصاً على لقائهم ومجالسة وجوههم.
ومما يذكر من نجدته أنه بعد تسلمه الإمارة بفترة وجيزة؛ انهارت عمارة في شارع المناخة، فسارع إلى الموقع، وأمر بضرب الخيام في المنطقة، وأقام فيها أكثر من أسبوعين، يشرف بنفسه على عملية إزالة الأنقاض واستخراج الأحياء والمصابين.
وكان طوال مدة إمارته حريصاً على متابعة الأمور في مواقعها، إلى أن داهمه المرض واشتد عليه، فنقل إلى مستشفى الملك فيصل في الرياض عام 1402 هـ، حيث وافاه الأجل المحتوم عام 1405 هـ،
وقد رثاه البدر بقصيدة .
و والدة الأمير بدر بن عبد المحسن هي الأميرة وضحى الحمود الرشيد - رحمها الله - .

//

و له من الإخوان كل من :

- سمو الأمير سعود بن عبد المحسن بن عبد العزيز أمير منطقة حائل.

- سمو الأمير وليد بن عبد المحسن بن عبد العزيز.

- سمو الأمير فيصل بن سعد بن عبد العزيز.

- سمو الأمير عبد العزيز بن سعد بن عبد العزيز نائب أمير منطقة حائل.

و له سبع أخوات.

--

و له ثلاثة أبناء هم:

- سمو الأمير خالد بن بدر بن عبد المحسن بن عبد العزيز.

- سمو الأمير سلطان بن بدر بن عبد المحسن بن عبد العزيز.

- سمو الأمير سعود بن بدر بن عبد المحسن بن عبد العزيز

--

و له عشر بنات و هن :

- سمو الأميرة نوره بنت بدر بن عبد المحسن بن عبد العزيز.

- سمو الأميرة لمى بنت بدر بن عبد المحسن بن عبد العزيز.

- سمو الأميرة العنود بنت بدر بن عبد المحسن بن عبد العزيز.

- سمو الأميرة صيته بنت بدر بن عبد المحسن بن عبد العزيز.

- سمو الأميرة بسمه بنت بدر بن عبد المحسن بن عبد العزيز.

- سمو الأميرة لين بنت بدر بن عبد المحسن بن عبد العزيز.

- سمو الأميرة سلمى بنت بدر بن عبد المحسن بن عبد العزيز.

- سمو الأميرة مشاعل بنت بدر بن عبد المحسن بن عبد العزيز.

- سمو الأميرة الجوهرة بنت بدر بن عبد المحسن بن عبد العزيز.

- سمو الأميرة وضحى بنت بدر بن عبد المحسن بن عبد العزيز.

حفظهم الله جميعا ..

#2 04-13-2009, 03:30 AM

//

نشأ الأمير بدر بن عبدالمحسن في بيت علم وأدب حيث كان والده الأمير عبدالمحسن بن عبدالعزيز - رحمه الله -

محباً للعلم والأدب، كما و انه شاعر مبدع ولديه مكتبة ضخمة تضم العديد من الكتب كما أن مجلس والده - رحمه الله - مليء بالعلماء والأدباء وكبار المفكرين في ذلك الوقت مما كان له الأثر البالغ - بعد الله - في حب الأمير بدر للأدب والشعر .

//

درس مراحله الإبتدائية بين المملكة العربية السعودية و مصر، والمتوسطة في مدرسة الملكة فكتوريا في الاسكندرية، ودرس المرحلة الثانوية في المملكة العربية السعودية .. كما انه درس في بريطانيا ( لندن ) و في الولايات المتحدة الأمريكية.

و لقد استفاد من وجوده في بعض هذه البلدان بلقاءاته مع العديد من الرواد والأدباء و المفكرين و عمالقة الفن من أمثال الشاعرأحمد رامي و محمد عبد الوهاب و محمد الموجي وعبد الحليم حافظ و كثيرين غيرهم.
و في نهاية الستينيات و مطلع السبعينات أصبح سموه رئيسا للجمعية السعودية للثقافة و الفنون حيث اضفى عليها العديد من الأفكار وكان لسموه الأثر الكبير في تطوير هذه الجمعية و الرقي بها.

//

أقام سمو الأمير بدر العديد من الأمسيات و كان أولها الأمسية التي اقيمت في نادي الإتحاد بجدة،
و تتابعت بعد ذلك الأمسيات واحدة تلو الأخرى و منها على سبيل المثال امسيات سموه في البحرين،
الإمارات، الكويت، و العديد من الأمسيات داخل المملكة العربية السعودية.

غنى له العديد من المطربين،
على المستوى المحلي و على المستوى العربي و أبرز من غنى له الفنان طلال مداح،
محمد عبده، عبادي الجوهر،عبدالمجيد عبدالله ، عبد الكريم عبد القادر، نجاة الصغيرة،
خالد الشيخ، عبد الرب ادريس، عبدالله الرويشد و العديد من الفنانين الاخرين،

و لقد أحدثت قصائد سموه تحولا في الأغنية السعودية و الخليجية بشكل عام ،
حيث نهج سموه أسلوبا جديدا لم يكن معروفا من قبل في الكتابة.
و أصبح مدرسة ينهل من معينها العديد من الشعراء الشباب في الوقت الحاضر.

//

و من أهم الأعمال التي قام بها سموه قيامه بعمل اوبيريتين لمهرجان الجنادرية :
- الأول هو اوبريت وقفة حق في مهرجان الجنادرية السابع عام 1412 هـ - 1992 م.
- و الثاني هو اوبريت فارس التوحيد في الجنادرية 14، و قد حصل هذا الأوبيريت على
جائزة في مهرجان القاهرة للإذاعة و التلفزيون حيث اختير هذا العمل من ضمن أفضل الأعمال،
و تميز الأخير بالمزج بين الدراما و الشعر مما أضفى على العمل رونقا خاصا.

//

على الصعيد الإعلامي تهافتت الصحف والمجلات الشعرية على تغطية أخبار الأمير بدر منذ بداياته
حتى وقتنا الحالي، سواءً عن طريق نشر قصائد سموه أو نشر لقاءات صحفية أو تغطية لأمسياته
، كما ان للقنوات الفضائيةوالأرضية المرئية منها والمسموعة نصيب من شاعرنا
حيث غطت أغلب أمسيات سموه إضافةً الى العديد من المقابلات التلفزيونية والإذاعية.

//

و لسموه اهتماما بالرسم كهواية الى جانب الشعر حيث بدأ الرسم منذ نعومة اظافره
و لسموه العديد من اللوحات الجميلة و المعبرة،
كما ان لسموه اهتماما بالقنص و صيد الحبارى و أهتمامات عديدة في الكمبيوتر فيما يخص
الرسم و التصميم و كذلك الإنترنت.

//

[ مآ ينقش آلعصفور في تمرة آلعـذق ]

[ رسآلة من بدوي ]

[ لوحة ربمآ قصيده ]

.
.

#3 04-13-2009, 03:30 AM

بيض الردون..
يبني السراب خيامها..
وسط الخلا واقدامها..
تنبت عشب وتمطر غمام..
لامن لمحت اثارها..
يطري علي عشق الخلا..
وقصيدةٍ (( لبن غيام))1
في حومة العقبان..
في الازرق .. الازرق..
شمس الضحى جمره..
شفت الندى يعرق
في وجنة النوار..
بدخل تحت سدره..
وما سحت الاغصان..
من ظلها البارد..
على الثرى الممطور..
واطلق عيوني طيور..
وانا على المشراف..
ومن حاجرٍ به شيح..
جول الحباري طار..
ريشه يخض الريح..
خض البحر مجداف..
وين انت ياالصقار..
جول الحباري .. طار...
بيض الردون .. طيري
برقة جناحك لي..
وحتوفك لغيري ...

//

ادري ان الوقت يذهب ما يعود
اربعينٍ فارقتني يالعنود
ماطر الايام من غيم الزمان
ما يبل الريق لو مهما يجود
كم شربته صافيٍ بارد قراح
ما دريت ان الظما سر الوجود
كل شمسٍ تلمس اشجار العمر
تحرق الاوراق وتجف الفنود
وكل ريحٍ تدفع شراع العمر
ينقطع به حبل ويميل العمود
اربعين مرت وتوني صغير
انتظر لعل تصدق لي الوعود
والغريب اني على هذا مغبوط
ادري اني بخير لا شفت الحسود
الزمن يا بنيتي كله زوال
ما تخلد كود لحظات السجود

//

لا تشد القيد ...
تجرح يدي ... أو تجرح القيد ...
قيدك غدى يوجع يدي ...
سجني أنا انت ... وسجنك أنا ...
والحب ... الحب عبدي وسيدي ...
لا ... لا تشد القيد ...
دمي ... جرى ... دمك ...
همي إني اشوفك في يدي ...
وإلاّ يدي همّك ...
في معصمي صرت ...
إنت السجين في معصمي ...
وكانك تصبرت ... أنا مقوى الصبر ...
دمعي في عيني ... وصرختي تملا فمي ...
سجني وسجاني ... أحزانك احزاني ...
وشلون ابنساك ... وشلون تنساني ...
محبوس في عيونك دمع ...
وزنزانتي ... تقطيبة الحاجب ...
وحاول توارى في الجفا ...
يا وجهه الصاحب ...
بتشوف نفسك في يدي ...
قيدٍ رقيق ...
قيدٍ سلب حريتي ...
ليته طليــق ...
يا صاحبي ... ما به ابد قيدٍ طليق ...
لا ... لا توجع يدي ...
سجني انا انت ... وسجنك انا ...
والحب ... الحب عبدي وسيدي ...

//

#4 04-13-2009, 03:31 AM

ادفن يدي .. تحت الثرى ..
واسقيها من جفني ارق ..
يذبل مابين اصابعي ..
عشب و ورق ..
ادفن يدي .. فوق الثرى ..
يلفها برد وسموم ..
واحس بعروقي يبست ..
ما توصل عروقي الثرى ..
ولا تشرب عروقي النجوم
وينبت على جفني سهاد ..
يذبل ورا صدري الشجن ..
اشقق اوراق الزمن ..
وانام ..
في حلقي الليله جفاف ..
شربت أيامي .. ومضت ..
واللي بقى جرحي الوفي ..
في خاطري باب يرد ..
وسراج دوبه ينطفي ..
اغطي الظلمه بظلام ..
كل ما اشد اصابعي ..
على العيون المتعبه ..
جرحٍ ينام .. وجرحٍ شعر بي وانتبه ..
قام وتبعني لشرفة ظلمه بعيد ..
جاني يقاسمني السهاد .. جاني قصيد ..
ادفن يدي تحت الثرى .. فوق الثرى ..
واعيش انا بباقي يدي ..
نصفٍ يموت .. ونصفٍ درى انه يموت ..
يا سيدي .. ربي انا نقطه فـ بحر ..
علمني كيف اهوى الحياه ..
علمني كيف اهوى القدر ..
علمني بإماني اكون ..
يارب .. اكثر من بشر ..

//

المنزل ثلاث جدران .. ورابع ..
ما بينهم ضايع .. متشقق وعاري ..
ويميزه شباك .. ضيق ..
مصبوغ.. بالأحمر الناري ..
ومحاصرٍ باسلاك .. علقت بها وردة ..
أوراقها المنزل .. والبرعم الأفلاك ..
***
وعلى الجدار الثاني ..
وأمثال .. وأغاني
مكتوبة بكسرة فحم ..
وصندوق خشب ..
مزخرف بغير الذهب .. غير الجواهر ..
تحت الكتابه نافر ..
فوقه ظلالٍ عريق ..
مثل العنيد .. من الجروح ..
مثل السيوف اللي مقابضها حديد ..
أسرار من ماتوا بعيد ..
وما خلفوا حتى الورق ..
***
أما الثالث من الجدران ..
معلقٍ عليه صورة .. لإنسان ..
من دفتر نفوس .. مكبره ..
مدري جفونه مبخره ..
ولال تجاعيد خيوط .. دخان
وفي الركن كرسي خيزران ..
يجلس عليها الوقت ..
وجريدة ٍ عنوانها باهت .. تغفى على الإسمنت ..
وفوقها كوب فارغ .. وفتات خبز ..
وأصابع ٍ للجوع صفرا مكسره ..
***
ويبقى الجدار الأول ..
وهو أعرض الجدران .. وأكثرها وقار ..
وهو الوحيد اللي انبنا فـ نور النهار ..
بوابته على الطريق الرملي ..
صَفت أحجار درجها .. بصبر ..
وش كنها .. ؟؟
سنونٍ صفر .. في فمٍ مذهول ..
وظلما تشدك للدخول .. تشدك ..
وكل ما مسكت اكرة الباب النحاس بيدك ..
تلطخت بدم ٍ طري ..
الجرح نزفٍ يحتري .. أما الطعون ..
وين الطعون .. راحت ..
***
البيت ثلاث جدران .. ورابع ..
مالهم طابع .. يجمعهم ..
يشبهون أهلهم ..
وما صادفوا غير الحياة ..

//

التفت ...
وتوها ... توها ما اختفت ...
ماكساها الليل ... باللون الحزين ...
التفت ... وتعالت صرخته ...
في نظرته ...
صاح ... لكن بالنظر ...
وانكسر .... شوفه عثر ...
حسايف .. تذبل الضحكه وهى بين الشفايف ..
تذبل الفرحه وتضيع ...
ويصبح الكون الوسيع ...
مايكفي خطوتين .. لاكساه الليل بااللون الحزين ..
يوم مدلها يده ..
كانت الرجفه لقا ..
ودعت فيها الشقا ..
وتركت بين الاصابع ..
عطــرهــا ..
وعمرها ... ما جت على وقت الوعد ...
إلا ذاك اليوم ...
و عمرها ... ما بكت .. و ما ضحكت ...
ما حكت له .. واسكتت
مثل ذاك اليوم ...
كانت أجمل من خياله ... كانت انضر ...
كانت أكثر ... من أماني عمره الظامي حنين ..
و اختفت ... من كساها الليل باللون الحزين
اختفت في الطريق اللي معه ...
كانت تجيه ...
كيف دربٍ جمعه معها ... خذاه ...
ليتها اختارت سواه ...
تزرع القرقا لياليها ... عليه ...
وحسايف ... حسايف ...

//

#5 04-13-2009, 03:32 AM

//

ياللي خذا شعره من الطير تغريد
ومن مدلهم الغيث صافيه لا جاد
ومن كل روضٍ عله السيل ترديد
ريح الزهر ومداعب الريح الأفناد
ومن كل صبحٍ بدد الليل تبديد
دفا الشعاع وفرحة النور لاباد
جاني قصيدك مثل عقدٍ على جيد
الجادل اللي كلها زين وعناد
ما هي من اللي يدلهون المواعيد
حشا ولا هي في الهوي صيد من صاد
وتلفتت روحي لحسنا من الغيد
واشتب في قلبي من الشوق وقاد
ولمست قلبي لين كله تجاعيد
شاب الهوى يا ليت ما فات ميعاد
يا بو حمد ما عادلي في الهوى سيد
وغيره فلا والله ما نقبل اسياد
وين الذي وصله على العين تسهيد
( ولا ودي اقطع درب لاماك برقاد )
يابوحمد وين وصلتنا التناهيد
ضاع العمر ما بين قرطاس وامداد
وانا احسب الشعر صعب المواريد
ماهو غديرٍ ينضحه كل قصاد
يوم امتلا هالجو حشو ومفاريد
راع الجمل معذور لو كسر إشداد

//

فم الجروح .. نوافذ البوح..
هذي ثقوب الصارخ الحي..
نوافير من ضي .. وجدار
أملاها بحديث النار..
وأكسرها على اقدام الأماني..
مره أغاني .. كلام جارح..
وهذا القصيد اللي كتبت البارح..
اليوم انفاس الصباح..
تلفح الجروح..
آه يا صبحٍ لمحت .. في عتمته روحي ..
طفله تصدح على خشب المسارح ..
يا صوتها الغاضب المقطوع ..
بعض السواد .. شموع ..
ومحدٍ درى وش قلتي..
خانتني الجوارح..
مثل القصيد اللي كتبت البارح ..

//

ودي اختار.. الليله درب ..
ما تعرفه ..
ودي اجلس في مكان ..
ما يذكرني بصدفه ..
أو وعد ..
ودي أحكي يا حبيبي .. مع احد ..
غيرك احد ..
لجل النهار .. وحريتي ..
اعطيني .. لحظة اختيار ..
وحدي وغديت أنت الزحام ..
وحدي أبد .. وانت الكلام ..
نورك وما غيره .. ظلام ..
عذب الحروف .. طاغي الطيوف ..
أبعد عن عيوني .. بااشوف ..
لجل النهار .. وحريتي ..
اعطيني .. لحظة اختيار ..
ابي درب .. مايوصلني لدارك ..
ابي وعد .. ماحتمل فيه انتظارك ..
وابي ليل .. مايجي بعده نهارك ..
ودي ادري .. هي حياتي ..
اختياري .. أو اختيارك ..
ودي انسى .. ليله وعدك .. أنسى وعدك .. ماأجيك ..
وش يضرك .. لواخونك .. مره واختارك عليك

//

جمرة غضى .. أضمها بكفي
أضمها حيل . .
أبي الدفا .. لو تحترق كفي
وأبي سفر لليل
بردان أنا تكفى .. أبي احترق بدفا
لعيونك التحنان .. فعيونك المنفى
جيتك من الإعصار .. جفني المطر .. والنار
جمرة غضى
والله الجفا برد .. وقل الوفا برد
والموعد المهجور ما ينبت الورد
ياحبي المغرور .. ياللي دفاك اشعور
رد القمر للنور .. واحلى العمر .. في وعد
بردان .. بردان أنا تكفى.. أبي احترق بدفا
يا أول الحب .. شفتك أنا مره
واهديت لك قلب
ورديت لي جمرة
ومن يومها كان الرحيل
وليل الشتا .. القاسي الطويل
وآه يا الحنين
لليل باب له حارسين
برد وسحاب

//

أنا ما أشير بالفرقا .. ولا أحدك على المقعاد
تخير في طريق الوصل .. والا درب هجراني
حرام الوصل ما يجمع قلوبٍ عن هواها بعاد
وبعض البعد لو عذب يجمع بين خلاني
تحسب ان الهوى ضحكة دقايق عشتها في ميعاد
إلى ما رحت تنساها .. وتنسَى الوعد وتنساني
ألا يا صاحبي .. الرفقة ترى مَا هِى ثياب جداد
تبدلها متى مليت .. وتلبس غيرها ثاني
إلى ضاع الوفا .. مابه هوى بارجيه أنا .. ووداد
ترى ذا الفرق .. بين أقرب قريب .. وبين عدواني
تحاكيني بطرف لسان وهرجي من صميم فواد
وتاقف من بعيد .. ويم درب الموت تنخاني

//

البارحة والقلوب أصحـاب كنت القمر وأنت تمدحني
واليوم .. لي مخلبين ونــاب ومشا هد الـدم يفرحني
كذاب هذا المـدح كـذاب وكـذّاب ذنمٍ يجـرحني
إنسـان..ماني نجم وشـهاب وليتك مـلاكٍ وتصلحـني
لي صرت عـاري..علي ثياب بالله وشـلون تفضحـني
اخطيت واخطيت كافي عتاب إنطـق بحكمي وريحـني
ياصـاحبي ماقطعت أرقـاب عـدلٍ قصـاصي وتذبحني
ولاني بعد أجمل الأصـحاب الأجمـل إنـك تسـامحني

//

تالي نهار وعاتق الشمس مذبوح
والوقت لو تدرين للوقت ذباح
كن السما صوتً من الذعر مبحوح
والليل خيلٍ سود للضي تجتاح
وسحايبٍ فوق الشفق كنها قروح
على جبينٍ ما شكى كثر ما طاح
لاذت عصافير المسا في ذرا الدوح
وتنفس سراج الوهن بين الألواح
حبيبتي ضاق الفضى وين باروح
وان رحت ظلم النفس للنفس ما راح
مجروح ماهو هم لو قلت مجروح
يالله عسى ما اصير في قلبك جراح
تبسمي برقٍ على ثغرك يلوح
بشد له مدام في العمر مـرواح
غزيت وجه الصبح من غير مصلوح
وانكفت دون الشمس هقوات ورماح

//

يسعد صباحك .. ليلنا تو ماجا
الشمس غابت واشرقت عندكم شمس
هى شمسنا اللي في جبينك تلاجا
والا قمرنا اللي فقدناه من امس
ليل السما برد وسحاب وعجاجا
يامن يشب النور في الخاطر العمس
انتى وانا لو كان منا نتناجــا
لاماطفت في خاطري شمعه الهمس
ياللى جرحتك مالجرحي علاجا
ادري الجروح النازفه تكره .. اللمس
بقول احبك وان عقدتى الحجاجا
لا قولها ثنتين واربع مع خمس
ويسعد صباحك يابعد كل ماجا
وماراح من عمري وانا في رجا الشمس

//

#6 04-13-2009, 03:32 AM

//

صحيح اني انسى الحوادث والملامح و الاسامي..
لما أكتب عن غرامي .. شعر ابعد ما يكون عن مجرد
جرح دامي ..
يمكن أقرب للجنـــــــــون...
من تفاصيل الحكاية..الاساور والمرايه..
عندي همــــــوم القصيده غامضه صعبه عنيده..
وانت عاشق للوضــــوح ..
ودك بسري ابوح..و انا اخر همي بــوحي
اعبر الشارع ... في الرصيف الثاني قهوه
فيها اربع طاولات ..وحده اجلس فيها وحدي ..وحده للي بيجي بعدي .. وحده لأغلى حرف عندي..أما اخر وحده دايم للي فات..
من هموم وذكريات ..زحمة لكن كل من في القهوه ربعي
كلهم دمي و دمعي ليه ما تجلس مكاني
وهذا شوفي وهذا سمعي اطلب اقلام ودفاتر ..وحاول اكتب عن شعور ..لاهو ظلما و لا هو نور ..
قلب مابين السطور .. وانا اكتب اغنيه مثل الرسايل كنت اكذب .. و الخيال العذب كذب ..
كنت لازم اخفي سري و ما اقول
ان هالمره قصيدي هو خيالات الحقــول تطرد اسراب الطيور عن حقيقه عن شعور ....
ما هو في ذهب السنابل .. انما تحت الجذور ..
كســـــروا العشـــاق بابي ...
قطعوا لحمي ثيابي.. وخلعوا الادراج ..
طاحت مزهرياتي الجميله شققوا جفني كتابي وسألوا
وين الجديله
ودمعة العين الكحيله مالقوا في بيتي الا .. وما لقوا في صدري الا .. وما لقوا في قلبي الا ..
امنياتي المستحيله ..
و اني احـــلم بـــس احلــــم ..

//

الجريده ..
ادري وش سر الجريده
به أحد .. يقطع وريده ..
وينزف أخبارٍ جديده ..
وحنا نقراها الصباح ..
دنيا مكتوبه فـ ورق .. دنيا من دم .. وعرق ..
دنيا مجنونه ارق .. وهم ..
انسرق .. إحترق .. المهم
كلها أخبارٍ سعيده
وحنا نقرلها الصباح ..
لو طبعنا .. صفحة ما فيها خبر ..
لا حروف .. ولا صور
صفحة يملاها البياض ..
صفحة تملانا بياض .. ما يعكرها الحبر ..
كان ذي الصفحة الوحيدة
اللي اقراها الصباح .. في الجريدة

//

لا تدعك القلب ترجي يظهر المارد
ويقول لبيك عبدك باح مكنونه
قنديلك اللي انطفى ليل الشتا البارد
سيان عنده وفيت او توك تخونه
ترجّل الفارس اللي لاجله تطارد
يازين شلفاك ملت تطعن طعونه
كل ماحداك الضما جيت الضما وارد
كنك تعاف القراح وتشرب عيونه
شاب العتب وانقطع ما بينناالوارد
ولولا الندم ما غرس فـ ابهامه سنونه
والحزن سيف على ارقاب الفرح جارد
وكل بسمةٍ في ديون الصبر مرهونه
إن صادفك في طريقك بالي الشارد
قله يموت الهوى .. باعيش انا بدونه

//

ما سألته .. إسمه .. عنوانه .. مكانه ..
ومرني .. أجمل زمانه ..
مر في قلبي وراح .. خطوته مست جراح ..
آه .. مديت النظر .. وآه .. جرحني النظر ..
وما سألته كيف .. ضيعته خجل ..
يا إنت .. خبرني من إنت ..
جرحتني وين الدوا .. وين إنت ..
انامين انادي .. وليه أنادي ..
من أي وادي العطر ..
من أي شمس النور ..
ولا الشجن من أي شارع ..
وما سألته كيف .. ضيعته خجل ..
ما سألته ما مداني .. كلها كانت ثواني ..
حرف من خوفي قتلته ..
وحرف عانقني وعصاني ..
بس وقفت فـ مكاني ..
آه .. مديت النظر .. وآه .. جرحني النظر ..
وما سألته كيف .. ضيعته خجل ..

//

مثل الوسن إنتي ..
حبك سرقني .. وانتبهت
وتوي أعرف ان الزمن فرقه ووعد ..
وان الهوى ماله ثمن ..
***
باكر تجين .. أو ماتجين ..
أرجوك سوِّي اللي تبين ..
بس انتظر .. وعدك نعم ..
ما خلى للدنيا طعم ..
***
الا الحنين ..
باكر تجين .. أو ما تجين ..
أرجوك سوِّي اللي تبين ..
بس انتظر .. وعدك نعم

//

في آخر الصفحه .. يسار ..
خبر صغير .. حادث قطار .. مات أربعة ..
مكتوب في السطر الأخير ..
باقي التفاصيل .. في الصفحة العشرين ..
على الثرى .. وبين الورق ..
أجسادهم امقطعة ..
الأربعة .. لجل المساحة ماتشيل ..
وفي باقي الصفحة صور ..
فنان .. وحصان .. و كور ..
وابحث عن الخبر الحزين ..
في نهاية الصفحه يمين ..
حادث قطار ..
ماتوا ثلاثة وطفل ..
وباختصار .. شديد .. شديد ..
كان القطار .. هو الوحيد ..
اللي بأسم ..
بلا ملا مح .. أو أسامي ..
ليه كلنا نموت ..
ليه نهمل الجثه ..
ونتذكر التابوت ..
لأقدامنا صوت ..
من يسمعه ..
من يسمع الأقدام..
هم مروا من تحت الكلام..
الأربعة ..
وصاروا أرقام .. أرقام ..
أنا رقم .. اصقه ضرير ..
المشكلة .. مثلي كثير..
يجمعنا حب الهاويه ..
احلامنا .. انا نصير..
وقاماتنا متساويه..
نركض على ورق الحياه ..
لين ننمحي ..
المشكله مانستحي ..
إنا نمرّ ..
ماشافنا انسان ..
ولا سمعنا انسان ..
اكتبني يالنسيان ..
انا رقم ..

//

#7 04-13-2009, 03:33 AM

//

كل ما كتبت أبها .. نشت فوق الأوراق
سحابةٍ .. وابتل في الصدر معلوق
أخيل بين أصابعي .. نوض براق
وكن القمر ينبت له غصون .. وعروق
شقت ثياب الليل .. عن جلد الأشفاق
لا بان لي معنى0 .. ولا زانت طروق
ضاع القصيد00وما بقى غير الأشواق
وأحلى الشعر ما يكتب الشوق في الشوق
إن خان بي الشاعر .. فأنا جيت عشاق
وكل عاشق لا بد ما يطلب حقوق
يا سودة أبها .. خاشري كل شعاق
كبد السما لا شك لدي لي بموق
إن كان أبو بندر على الوصل سباق
لي الفخر .. إني من الشيخ مسبوق
لأجلك عسير .. أزعلت خلاني فراق
جيتك .. ودونك أشهب القاع مشقوق
لي ديرةٍ خدانها مثل الآفاق
فاطرافها .. وديان .. وجبال .. وعروق
وحّد ما بين ترابها .. دين وأخلاق
وفرّق شمل عدوانها .. كفر وعقوق

//

ابعتذر ... عن كل شيء ...
إلا الهوى .. ما للهوى عندي عذر ..
ابعتذر .. عن أي شي ..
إلا الجراح .. ما للجراح إلا الصبر ..
إن ضايقك اني على بابك أمرّ ...
ليلة ألم ... واني على دربك مشيت عمري وأنا
قلبي القدم ...
ابعتذر ... ابعتذر ... كلي ندم ...
عن كل شيء ... إلا الهوى ...
ما للهوى عندي عذر ...
ا تصدقي ... ما اخترت أنا أحبك ...
ما احدٍ يحب اللي يبي ...
سكنتي جروحي غصب ...
ياحبي المرّ ... العذب ...
ليت الهوى وانتي ... كذب ...
كان اعتذر لك عن هواي ...
ما أقول أنا ... كوني معاي ...
ان ضايقك اني على بابك أمرّ ...
ليلة ألم ...
واني على دربك مشيت عمري وأنا ...
قلبي القدم ...
ابعتذر ... ابعتذر ... كلي ندم ...
عن كل شيء ... إلا الهوى ...
ما للهوى عندي عذر ...
الله كريم .. حبك ... يكون ...
همي القديم ...
وجرحي القديم ...
والله عليم ... يا أحلى العيون ...
ان الفراق ... جزا الفراق ...
ابوعدك ... كان الطريق بيبعدك ...
بامشي الطريق ...
وكان الجحود بيسعدك ...
مالي رفيق ...
ابجمع أوراق السنين ... وأودعك ...
كان الفراق اللي تبين ... الله معك ...

//

يا اجمل الحزن .. لدموعك سلام
من حبيبٍ ... بقى منه الكلام
وين انا منك .. غربني الزمان
وخانني النور ... وابعدني الظلام
لو بعزيك ... سالت دمعتي
تدري الدمع في حبك ... حرام
لو بواسيك ... مايكفي الهوى
ولو أبي ... عذر مايكفي الغرام
أعطنى من عذابك يا البعيد
صرخةٍ ... تجعل ظلوعي حطام
آه ...لو في يدي أبكي معاك
قطرةٍ مادرى عنها الغمام
ماابخل الوقت ... يحرمني البكا
وانت لجلك حرمني الإبتسام
يا اطهر الحزن ... لو كان القصيد
يكشف الغم عن بدر التمام
لكتب الشمس شعرٍ في سناك
وامحي إمن السما...عج وكتام
ياعسي البدر نوره مايغيب
عن حبيبٍ بقي منه الكلام

//

أنا حبيبي بسمته تخجل الضي
يكسف سنا بدر الدجى من جبينه
راعي العيون الناعسه رمشها فّي
وإن سلهمت ذاب الحشا من حنينه
له نظرةِِ لا هي سَرابٍ ولا مَيّ
راعي الهوى تفنى وراها سنينه
نور الصبايا .. بسمة الدّار والحيّ
نوره ولا شمس الضحى تستبينه
دامه معي أغلى الحبايب فأنا حّي
بالقلب أضمّه يوم قلبي ضنينه
له في ضميري من لهيب الوله كي
روحي معه عذب المناجى رهينه
ياصاحبي لا تنشد الروح عن شيّ
أنا حبيبي .. نور كل المدينه

//

يطيح جفن الليل واهز كتفه
نجمٍ يشع وباقي الليل مطفي
واحاكي الجدران عن وصف غرفه
ماتشبه الجدران ويطول وصفي
وتملني الجدران واظهر لشرفه
تحت السما واسكر الباب خلفي
ريحٍ تهب وتسكن العظم رجفه
وتموت ريح وتسكن اوراق نزفي
على الروابي تهطل دموع وطفه
وتصب لمع بروقها وسط طرفي
ياطاري الغدران والعمر رشفه
مع قلها ياليتها يوم تصفي
الحب واجد مير الاقدار صلفه
والأرض واجد لكن الحلم منفى
واللي اعرفه راح ماعاد اعرفه
ولاظن يذكرني الى أقبلت مقفي
ماهو حبيبي مورد القلب حتفه
ولا هو حبيبي يفرح بوقت ضعفي
مر ثمر هالليل وأمر قطفه
يالحنظل اللي قمت اذوقه بكفي
متى الشوارع تجمع اثنين صدفه
لا صار شباك المواعيد مجفي
يابنت تو الليل ماراح نصفه
وياليل بعض اللي مضى منك يكفي

//

لا جيت أنا بــ سامحك..
تبكي الجراح ما ودها..
مشتاق ودي أصافحك..
عيت يدي لا مدها...
آه. .يا لجراح .. راح اللي راح ..
وراحتي .. من يا ترى بيردها ..
يا حب.. ياذ كرى واسم..
مدري انا ابكي عليك من العذاب اوابتسم..
صدقني في يأسي .. نفسي تبي نفسي تبيك ..
لا يا دفا شمسي تبيك..
ليه خنتني ..الله عليك ..
آه يا الجراح .. راح اللي راح..
وراحتي .. من يا ترى بيردها ..
لا تحاكي عيوني .. يمطر سحاب الملح ..
ولا تلمس أشجوني .. ينبت في قلبي جرح ..
ناظرني يا خلي .. جرح انا كلي ..
وشلون أبـ ارضى الصلح ..
فصل الخريف حبي ..حزن وورق أصفر..
...ودعني يا قلبي..وخل العذاب أقصر..
آه يا الجراح .. راح اللي راح..
وراحتي .. من يا ترى بيردها ..

//

أطوي الجديلة في كفوفي .. وهي ليل
ولا من طويت اليل .. صار الجديله
حلمٍ جمعني فيك .. ما كان بالحيل
حلمٍ ولكن .. شوفتي لك قليله
ناديت لك لين إسمعتني المواصيل
واشتقت لك .. كن العمر صار ليله
ولمستك بروحي .. وكانت قناديل
أصابعي .. والقلب نار.. وفتيله
ما هو غريب .. أبتل من جارف السيل
لا شك ينبت في عروقي خميله

//

يازين مافي العيون نعاس
والقلب مشغول بهمومه
اما معي نطرد الهوجاس
والا لك النوم وحلومه
هذي نجوم السما .. جلاس
وعيبٍ على العاشق القومه
لاجل الهوى عذبونا الناس
ومن بيح السد ما الومه
انفاسنا ماغدت انفاس
من حرها دوم مكتومه

//

صحيح اني انسى الحوداث.. والملامح .. والأسامي
لما أكتب عن آلامي .. شعر ابعد ما يكون ..
عن مجرد جرح دامي .. والأساور .. والمرايه .. والهوى القاسي الحنون ..
عندي هموم القصيدة .. غامضة .. صعبة .. عنيده ..
وانت عاشق للوضوح ..
يتعبك بحري ظلامي ..
ودك بسري أبوح .. وانا آخر همي بوح ..
تكفى لا تزيد فـ خصامي .. وقلي ما تفهم كلامي ..
انا انسى .. الحوادث .. والملامح .. والأسامي ..
2
لما أكتب أغنية مثل (الرسايل ) .. وانا أكذب ..
والخيال العذب كذب ..
كنت لازم أخفي سري وما اقول ..
إن هالمرة شعوري .. هو خيالات الحقول ..
تطرد اسراب الطيور .. عن حقيقة .. عن شعور
ما هو في حب السنابل .. انما تحت الجذور ..
كسروا العشاق بابي .. قطعوا لحمي ثيابي ..
خلعوا الأدراج .. طاحت مزهرياتي الجميلة ..
شققوا جفني كتابي ..وسألو وين ( الجديلة )
( وبسمة العين الكحيلة ) .. ما لقوا في بيتي إلا ..
ما لقوا في صدري إلا.. مالقوا في قلبي إلا ..
أمنياتي المستحيلة ..
وإني احلم .. بس أحلم ..
3
أعبر الشارع معاي .. في الرصيف الثاني قهوة ..
فيها اربع طاولات .. وحده اجلس فيها وحدي ..
ووحده للي يجي بعدي .. ووحدة لأجمل حرف عندي ..
أما رابع وحدة دايم للي مات ..
زحمة .. لكن كل من في القهوة ربعي .. كلهم ..همي ودمعي ..
ليه ما تجلس مكاني .. وهذا شوفي .. هذا سمعي ..
أطلب اقلام ودفاتر .. حاول اكتب عن حقيقة ..
ما هي وجه .. ولا مكان .. ولا دقيقة ..
أدخل الزحمة فـ ضميرك ..
لا تلفّت .. وانت ما في القهوه غيرك .. غمض الدنيا ..
وأكتب .. وإن سأل في يوم سائل .. عن معاني .. عن شعور ..
قله مابين السطور ..
وإلا تدري .. قله أكذب

#8 04-13-2009, 03:34 AM

//

على الغدير كانت سما..
ويرمي الضما وجهي عليه
على الغدير .. وجهي وسما ..
لين ارتمى وجهك عليه ..
على الغدير ..
وجهي .. ووجهك والسما ..
من يسبق ويملى يديه ..
يشرب ملامح صاحبه ..
ليت السحاب ..
يظهر على المدى الباهت ..
وتمر ثلاث طيور ..
بين العتم والنور ..
ينبت شجر .. واعشاب ..
وطفلٍِ يبيع زهور ..
يولد ..
وتتحول الاخشاب ..
كرسي ..
واجلس انا وياك ..
قبل الظلال هناك ..
في أخذ الصوره ..
على سلة السيف الصقيل ..
يتكحل سيفين ..
وينزف قتيل ..
واليوم عيد .. يا اللي الجفا وصلك ..
ومشغولة في كحلك ..
وشلون انا بحايدك ..
امرايتك سيف ..
و ذ بحي انا .. عوايدك ..

//

خطأ..
تبخل .. وأنا كلي عطا..
خطأ ..
ضاعت على الدرب الخطى ..
خطأ ابتدينا ..
وان نهيناها .. خطا !!
تزرع طريقي .. بالألم..
يا خوفي .. لا توطاه القدم ..
تجرح ظلايل.. فيتك ..
وتدمي ..أماني جيتك ..
لو فرحت.. بجيتك !!
بعد الظما.. وبعد الهجير ..
تخفي حنانك .. بالضمير ..
لو ما جنت ..
عينك علي بنظرةٍٍ .. لو ما جنت
ولو ما رضيت .. تحدني ..
روح الشقاوي .. ما عنت ..
واستهونت درب الهوى ..
ولو ما غدى جرحي دوا ..
ليته غدا..
عودتني منك الحنان .. عودتني
وطال النوى وجار الزمان .. صبرتني ..
وإثر الهوى .. مثلك غريب ..
ماله .. على نفسه حبيب ..

//

قصت ظفايرها .. ودريت
البارحه .. جاني خبر ..
أدري لبست خاتم عقيق ..
وتقرا لها كتاب .. عتيق ..
كتاب .. واظنه شعر ..
أحفظ أنا حجار الطريق .. اللي يودي لبيتها ..
واعرفها زين ..
واعرفها زين ٍ وانا ..
لا شفتها ولا جيتها ..
قابلتها صدفه .. على شفاه الصحاب ..
همسة أمل حسيتها
ودمعة عذاب ..
وصارت هي الخبر الجديد ..
وعلومها همي الوحيد
وش عاد .. لو كانت بعيد ..
بين الحروف حبيتها ..
حبيبتي .. يا حلم ..
ياللي أعرفك اسم ..
وجهٍ تصوره الحروف .. واتخيله ..
نجم ٍ احس انه قريب .. ما اوصله ..
انتي اللي اعرفه .. زين ..
واللي اجهله انتي ..
حبيبتي .. وياليتها ..
اعرفها زين وانا .. لا شفتها ولا جيتها ..

//

غربه وليل .. وعمر ضايع ..
وحب ضايع .. في مركب أماني ..
ماله دليل
وانت يا اغلي الحياة ..
في الحب ناسي .. ليتك تقاسي ..
لو قليل ..
يا خطوة دمع فوق الخد..
يا جرح .. يا عمري ماله حد ..
يا حب كبير .. يا حزن كثير ..
يا ليل البعد والتفكير ..
حبيبي .. وكل سنا عمري .. وثواني بسمتك كله
عذابي وقلت انا صبري .. اداري لوعتي فـ ظله
وفات العمر تغريبه ..
وضمت بسمتك .. غيبه
وعشت الحب في ليلي..
وذاب الصبر من ويلي
غربه وليل وعمر ضايع ..
وحب ضايع ..
في مركب أماني ماله دليل
وانت يا .. اغلي الحياة ..
في الحب ناسي .. ليتك تقاسي ..
لو قليل

//

يا رامي المـاء .. بالحـصا.. لأجـل الـدواير.. تكـبر..
لا تـوجـع المـاء .. أكــثر.. هـذي حـدود .. الـمـاء..
يـجـيـبــك الـهــاجــوس .. و يــروح بـك..
يا شــين وش نفع الحكي .. لا روح بـك..
تخـط فالـرمـل البحـر.. وتـرزّ وعـودك .. سـاريه..
وتبـقـى الحـقـيـقــه .. عــاريـه ..
ما عـاد في الـسـفـر الا دوايـر ..
بيـن الـكـواسـر.. والبـدن ..
ماكان لي صـدر.. وما كان لي كـف.. لحـمي تـنتـف ..
ناظـر.. عـلى راسـي تحـوم .. عــقـبـان الهـمــوم ..
وتـرســم دوايـر .. وقـلّ لـي .. وش اللـي صـايـر..
وكانـك حـبيبـي .. فـسّـر الكـون ..
و الا حـبيبـي .. اتـرك الـكـون ..
وقـل لي .. من خـذا منـي محـلي .. ليـن ضـاقـت ..
فسّـر اشـتاقـت.. تـبينـي .. حـدد اقـدامي .. جـبيني ..
و آخـر الجـدب .. العــوايـر ..
واتـرك الـمـاء .. لأشـهــب الـمـاء .. و الـدوايــر..

//

أركض ورا الشمس .. اللي تغيب ..
ابي النهار .. وينتحي ..
أخاف أنا وجهي الى طاح الظلام ..
فوق الملامح .. ينمحي ..
كافي سواد العين والظل الحزين ..
وشمسٍ تبين .. وماتبين ..
ورا السحاب ..
كافي بَعْض ليلٍ يجي .. قبل الغياب ..
عن ليل الغياب
يا موقد الشمعة ..
وجهي أنا .. أو نور ذا الشمعة ..
قاسي الشحوب ..
في رعشة الضي العليل ..
وتكبر مسافات الهروب ..
يا صاحبي الشمعة غروب ..
به قريةٍ .. تحت الظلام .. مريتها ماجيتها
وبنيةٍ .. تحت الظلام ..
ورسالةٍ في الليل ..
خانتها الحروف .. من القهر شقيتها ..
كلي عيون .. وماتشوف
والناس .. ياظل .. وطيوف ..
والظلما .. نسيان .. الحبيب .. لحبيب ..
أركض ورى الشمس اللي تغيب ..

//

وليله كانت الفرقا
و قالت لي .. فـ أمــان الله
و ليله ذكرها يبقى
على جرحي .. و لا انساه
و جت تاخذ رسايلها ..
و خصله من جدايلها
و تديني جوباتي
بقايا عمر بسماتي
و قالت لي .. فـ أمــان الله
في ليله كنها الليله عرفتك بسمتي و فجري
و ليله زي ذي الليله و هبتك في الأمل عمري
و يا ليت البسمه ما كانت ولا الاحساس
وياليت الدنيا خانتني و كل الناس
و لا خنتي هواي انتي
و لا قلتي .. فـ أمـان الله
لا تردين الرسايل ويش اسوي بالورق
و كل معنا للمحبه ذاب فيها و احترق
لو تركتيني في ليله بسمتك عند الرحيل
دمعة العين الكحيله عذرها الواهي دليل
و ليله كانت الفرقا
و قالت لي فـ امان الله

//

ماقلت له ... يا حلوتي ماقلت له ...
المشكله ... إني أختلف ...
لا طروا اسمك من الوله ...
وجهك تغيّر ... نظرتي ...
وتضحك في عيني يا عبرتي ...
وبعض الحكي ما اتحمله ...
ما اكذب عليك ... البارحه شافوك ...
رعشة هدب لفته ...
البارحه شافوك ... في النوم الذي عفته ...
وماحد ٍ يقول ... شافك معي مره ...
طيفك متى ... يكفيني من شره ...
باكر إلى مروا علي ربعي بقول :
إن السما ما هي سما ....
واغيّر اوقات الفصول ...
ان صدقوني .. ما دروا إنك هواي ...
وإن عاتبوني ... صارت عيونك سماي ...

//

#9 04-13-2009, 03:34 AM

//

يا الله لا تقطع رجا كل مشتاق
بامرك يا رب الحلم يصبح حقيقه
وأنا أدري أن الوصل تاليه لفراق
ولولا الأمل .. ما تحمل النفس ضيقه
أمس سرى في تالي الليل براق
قلبي يفز لنوضته بتخفيقه
وسمٍ بكور صادق الوبل دفاق
لو شافه الظميان يبتل ريقه
عله على دار الوفا .. دار الأشواق
دار صفت لأهل القلوب الرقيقه
فارقتهم ما ليلةٍ خاطري ضاق
واليوم للسلوان ما أجد طريقه
يا كود حرفٍ لي كتبته بالأوراق
مثل السراب اللي يسلي بريقه
والله لو كل المخاليق عشاق
ما شفت لك نفسٍ تعذب دقيقه

//

يا عذولي .. وش تفيد به النصيحه
لا تعذل القلب .. وجروحه طريّه
من يداوي علة الروح الجريحه
ومن يسلي دمعة العين الشقيه
ان شكيت من الهوى .. قالوا فضيحه
وان سكت استنقضوا جرحي عليه
وان نويت البعد .. ضاقت بي الفسيحه
وان بغيت القرب .. خان القرب فيه
من عذلني في الهوى الله يبيحه
ومن عذرني .. ما حصل مني خطيه

//

جهّى مطر دمع السحاب المجاهيم
سود العيون اللي انتثر وبلهنه
رمح الشمال اللي طعن مهجة الغيم
شق السحاب وسالت الشمس منه
ساعة غشاني دمعها كنه الديم
دب الوجل في المهجة المرجهنه
وقمت اتذرى بالصبر والتعازيم
بعضي يبوح الخوف وبعضي يكنه
ناديتها واللي يغيث المظاليم
انك ولا غيرك لقلبي مضنه
ان قالوا الحساد داله وانا .. اهيم
ما نيب انا ارجي من عدوي محنه
قالت تشد .. وقلت بالحيل باقيم
ما في الوطن .. وعيون الاحباب منه
تبسمت شوقٍ .. بحبٍ .. بتسليم
حبيبتي .. والا العدو خاب ظنه

//

إلى من .. يهمها أمرى .. إلى من ..
رجاءً .. إلى متى صبري .. رجاءً
أنا لن .. اشتكي .. همي لغيرك ..
ياروحي .. اشتكي روحي على من ..
رساله .. حبرها .. دمي ..
رساله .. تصرخ ابهمي .. إلى من ..
سألت الرمل .. في دروب القوافل ..
سألت الجدب .. عن لون السنابل ..
سألت الناس عن وجهك حبيبي ..
عن الشمس .. ومتى تشرق مساءً
أحبك .. يالصحاري اللي ..
فـ هجيرك .. احترق كلي .. وفاءً
كتبت لواحة عيونك رسايل ...
بسراب الدمع ... وانفاس القوايل ..
كتبت وذي ترى .. اخر رسالة
أحبك .. وان نسيتيني .. وداعاً ..

//

الله يعين الروح .. كم هي تمنى
شوف الحبايب ساعةٍ عقب حرمان
والله يجازي اللي بلطفه هدنا
وقتٍِ تبدل وأبدل الوصل هجران
أقفى ربيع الحب .. وأدهر وطنا
وشوك الثرى دسناه في درب الأحزان
خاط القدر بسلوك حكمه كفنا
وإلى حكم وش ياترى بيد الإنسان
حنا ضحايا الياس .. نرجي زمنا
ينظر لنا لو يوم لله بإحسان
حـــنا ليالــينا بــهـــوانا رمنــا
حنا .. جنينا ونرجي الله غفران

//

الشمس طاحت .. وبردت.. ورمد الشفق .. في حجر الارض
من يشتهي يدوس باقدامه على هالرماد كله ..
يا عابرٍ .. على المدى .. من السراب .. الى الندى ..
قلبي سقط فوق التراب شله..
او لا تدوس القلب خله .. كل يوم له شمس
وانا مالي سوى قلبي
انا .. من بكى لين الثرى بله بالدمع ..
ويوم اكتفى .. صد وعصر ظله .. ومسح بردنه .. وجنته ..
ثم ابتسم لين حسدوه الناس
يازارعٍ شوك الهراس .. فوق الرمل كله .. لاقدام من يكره الشوك
ياحظ من ياطى بقدم .. انا مالي سوى قلبي
الشمس طاحت ونثر الظلام ظله ..
على الجروح .. ياكاتم الزين الفضوح عن عيني
لا تظهر انيابك .. وتقطع احبابك شمات
انا من عطى ضي الشموس خله .. لين حسدوه الناس
ولا تنتظر غير السموس .. لله ..
انا مالي سوى قلبي ..

//

ينزع الحر .. للعالي المنيف
عادة الحر .. لطام يعاف
ذلني الشوق يالقاسي اللطيف
ولحظة الوصل .. من صدك تخاف
انا قلبي .. جناحٍ له رفيف
يتبع الشمس في الريح الصلاف
للوعد جيت من لون الخريف
وللوعد جيت من طعم الجفاف
ومر في ساعتي وقت ونزيف
ومر في خاطري حزن وزفاف
آه وينك انا مثلك كفيف
وليه قمراك تطلع ما تشاف

//

في زمان الشح .. يصبح للقمر
مثل نور الشمس في الليل العتيم
في زمان الشح .. يصبح للحجر
مثل ما للسيف من قدرٍ عظيم
في زمان الشح .. يملانا الفخر
لا تحدى الظلم كهلٍ أو فطيم
في زمان الشح في وقت الدهر
كل مجدٍ فـ ارضنا يولد يتيم
وش نقول اليوم ياطفال القهر
في القصايد ذل والله العظيم
ما فقدنا السمع ولاكف البصر
مير بين اضلوعنا قلبٍ سقيم
أهلنا صرتوا عناوين وصور
انتذكركم مثل وجهٍٍ قديم
كن ما به ارض لا نهر وبحر
كيف جرح الأرض يشفي في الصميم
علمونا اليأس من صبر وحذر
علمونا (القدس) ننسى (اورشليم)
لا سقينا غيث هتاف المطر
كان خضنا الحرب باطفال وحريم

//

في دروبي رمل لامن جيت ساري
ينبت الأشواك لامن رحت ساري
صاحبي ماجيتك إلا وفي طريقي
من ربيع العام نوّار وخباري
ولا تواعدنا وبه في الأرض زهره
ولا تفارقنا وبه للبرق طاري
لا تأخر دام لي في العمر ساعه
ولا تقدم لين أشوفك في انتظاري
الزمن ورده .. سهرت أحسب ورقها
وإن قضا ماجيت في دموعي عـواري
حبـّني كثـر اللـذي نلقـى بوعـدنا
من ظلال وريح ونجوم وغـداري
صاحبي مثل الخجل لو تكتسي بي
قبل أصير الشال يذهلني انحساري
ياقريب البعد .. للشكوى أسامي
الجفـا .. والخوف .. وآخرها حذاري
وانت لو خان الزمن بقول وافي
لا أنا تركي .. ولا أظنك مشاري

//

نبي .. نطفي قمرنا ..
لو يعذبنا السهر .. والخوف ..
نبي ننثر قهرنا .. يا حبايبنا ..
على مد النظر .. والشوف ..
نبي ننزع من أعماق الحشا سكين ..
نبي ننزف حنان العاشق المسكين ..
ونجرح في سواد العين .. صورنا ..
ونبي نطفي قمرنا ..
سامحينا يالمحبة .. لو جرحنا وانجرحنا ..
س امحينا لو نسينا .. في الهوى ضحكة فرحنا ..
وآه يالنصل الحرير ..
ياهوى القلب الضرير..
يالجروح اللي مضت .. واللي بتصير ..
نبي ننزع من أعماق الحشا سكين ..
نبي ننزف حنان العاشق المسكين ..
ونجرح في سواد العين .. صورنا ..
ونبي نطفي قمرنا ..

//

وتِرحَل ..
صَرخَتي تِذبَل
في وادي .. لا صدى يوصل
ولا باقي أنين
زمان الصمت ..
يا عُمر الحُزن والشكوى
يا خطوة ما غدت تقوى
على الخطوة ... على هم السنين
حبيبي .. كتبت اسمك على صوتي
كتبته .. في جدار الوقت
على لون السما الهادي
على الوادي ..
على موتي ... وميلادي
حبيبي .. لو أيادي الصمت
خذتني ... لو ملتني ليل
أنا عمري .. انتظاري لك
لا تحرمني .. حياتي لك

//

أتعب على المعنى .. ويسهرني القاف
ويلذ لي تجريح عذب القوافي
وإلى مزج حبر القلم دم الأطراف
يصير لي معنى على الناس خافي
عندي معاني الشعر تلمس وتنشاف
أنما جرحك الشعر ما هو ب كافي
وان ما لمس في القلب .. احساس وشغاف
عدّك كتبته فوق رمل السوافي
لاتحسب ان البحر موج ومجداف
ترى قليل البحر ما كان طافي

//

سيدي قم...
ما خبرت اللي يحب يشتهي النوم
سيدي قم...
لاتنام وفي السماء باقي نجوم
يا جريح البارحه
كيف طبت اليوم
سيدي .. يا سيدي قم
سيدي ...الليل للعاشق نهار
قم معي ... نجمع نجوم الظلام
سيدي ... لو عرفت الانتظار
ما غفا لك جفن .. .يا عذب الكلام
اه لو تدري الهوى والسهر مقسوم
يا جريح البارحه
كيف طبت اليوم
سيدي .. يا سيدي قم
سيدي ... لا تناظرني بغضب
ودي تحس مثلي بالغرام
سيدي ... ما وراك الاالتعب
ليت عيني مثل عينك تنام
اه لو تدري الهوى والسهر مقسوم
ويا جريح البارحة كيف طبت اليوم
سيدي .... يا سيدي قم

//

#10 04-13-2009, 03:35 AM

//

هيه يا غصن تمايل بالدلال
ما تخاف الكسر لا هب الهبوب
وما تخاف الله وتسعى بالعدال
انصف من لحاظ عينيك القلوب
لا متى ذبح العرب عندك حلال
تابت العالم متى عينك تتوب
مير قلبي يا لغضي بيعه محال
ما أقدر أعطي لو تبي مني ذنوب
أشهد إنك بالحلى فقت الخيال
وعيب حسنك كان في حسنك عيوب
شارقة في طلعتك شمس الجمال
وجامع في ضحكتك كل محبوب
الخمل فيني انا ما بك خمال
مشملٍ نوّك .. وانا نوّي جنوب

//

تذكٌر .. صوتك يناديني ...
تذكر ... تذكر ...
تذكر الحلم الصَغير ...
وجدار من طين وحصير ...
وقمَرا ورا الليل الضرير ...
على الغَدير ...
لاهَبٌت النسمَة تكسر ...
جيتي من النسيان ...
ومن كل الزمان ...
اللي مَضَى ... واللي تغٌير ...
صوتك يناديني تذكٌر ...
ناديتي ... خانتني السنين ... اللي مَضت راحت
ناديت ... ماكن السنين ... اللي مضت راحت
كنا افترقنا البارحة ...
البارحة .... صارت عمر ...
ليله ... أَبَدْ عيٌت تمرٌ ...
ياجمرة الشوق الخَفي ...
نسيت أنا وجرحك وفي ...
يتذَكر الحلم الصغير ...
ريانَة العُود ... نادي ...
نادي الليَالي تعُود ..
بشوق الهَوى ... بوعُود ...
بوجهي اللي ضيعته زَمَان ...
في عُيُونك السٌود ...
ياالضحكة العَذبة ...
عَنك الصٌبر ... كِذبه ...
وفيك العُمر موعود ...
اشتقت للحلم الصغير ...
واشتقت لجدار وحصير ...
وقمَرا ورا الليل الضرير ...
على الغدير ...
ان هبت النسمَة تكسر ...

//

لو كـان في كفي رميته في كفك
يفـداك مافي الحب من صـادق الحب
تـحبنّي؟..ياعلّني بعض ضـعفك
قلبي جـرادٍ باد مـا حصـّل العشب
أنا قـديم الـهم وأنفـع لعطفك
أما الـهـوى ياسـيدي مركبه صعب
يا ليت لي صهوة جوادٍ وأخطفك
للشمس لنجـوم المجـرات.. للشـهب
تحبني..وأقـول من زود لـطفك
شكراً صدقت .. وألف شكراً على الكذب

//

تلعب وانا .. ما عاد لي بالطرب شف
لعبك بروحي بدل الفرح بجراح
زل الطرب يا موجع الطار بالكف
شابت قوافي الليل .. نور الضحى لاح
كانك تدق القلب .. دقك على الدف
عسى الضلوع توقي القلب لا طاح
شفتك .. ولا ادري من قضب بعدك الصف
ناس ٍ كثير .. وكنهم عندي أشباح
نورك دعاني عندك الشوف وقف
كنه فنارٍٍٍ لاح في عين ملاح
من له ثمان اسنين من راح منكف
خلّى السفين وعارض الموج سباح
من فرحته ما حسب االحيل يتلف
غلب عليه الموج والقاع منزاح

//

سوالف ليل ..
بجنب المنقد الغافي ..
على حد السهاد ..
تحدثنا في تالي ليل ..
زرعنا سرنا الخافي ..
على شفاه الجمر معنى ..
وخفنا الناس تسمعنا ..
يا انتي .. لاتوادعنا...
في تالي ليل لاتخافي ..
بنلقى اللي بقي معنا ..
سوالف ليل ..
أو حفنة رماد ...

//

من يطعن السيف ابـ حشاه .. ويجرح السيف ..
من يضرب السيف ابدماه .. ويقطع السيف ..
السيف .. المعدن البارد ..
نصل الشتا الحاد ..
له تحت جلدي .. طريق ٍ ضيق ٍ بارد ..
وله صرختين اجداد ..
حبيبتي .. يا نبتة الدم ..
السيف .. إما قتلتي اعناد ..
والا قتلتي هم ..
ومضة شعاع ٍ خاطفه .. السيف ..
الصمت قبل العاصفه .. الألم .. لا فارق اللحم .. العظم ..
كم .. لحظة ٍ .. يا انتي إنطحنتي خايفة ..
من موعدك .. قبل الوعد ..
ورديتها .. قلت ارجعي ..
وكم صرخة ٍ .. ياللي ان جرحتي .. توجعي ..
ولو انجرحتي توجعي ..
اطلقتها بعد العد .. وشقت ضلوع العاطفة ..
من يطعن السيف ابحشاه حبيبتي
ومن يضرب السيف ابدماه .. ويقطع السيف ..
وقفت وضلوعي ( الصفاه )
اغطي عيون الأمل ..
ابغترة الحزن .. واركعه ..
كان الجفا .. سيف ٍ يسيل ..
في لحظة قصاص ..
وكانت عيوني تودعه ..
تشتاق .. للموت .. الخلاص ..
يا نبتة الدم .. السيف ..
مره قتلني عناد .. ومره قتلني هم ..

//

ياحروفنا الملح.. في شفاهنا الحنضل ...
كان السكوت أفضل .. ولا الكلام ؟
قلت اللي في قلبي ..
وخرج الحكي..من الحكي وما عاد..
اخيامنا طويت ..كافي ندق اوتاد
الكلمه .. ماهي انتصار
ولا انكسار ..
كانت حقيقه ..
يوم انقطع حبل الحوار
يا حروفنا الحنضل.. في شفاهنا الملح
زعلوا حبايبنا..كان السكوت أفضل

//

الله يعلم إني حاولت .. حاولت
أسند على كفي السما .. وأناظر الشمس
أشرب عن عيونك ظما
أشرب ظما الشمس
وقلتي عسى ... جفنك عسى مايحترق
حاولت ماأغمض عيوني
حاولت أنا .. ما نفترق
..آه لو تدرين لوتدرين
لاعوّد العاشق حزين
يمشي على جفن وجبين
عزاه يالقلب الشجاع
ضاع الأمل .. وما لك عذر
من لمست عيوني الشعاع
زندي أنثنى .. ورمحي أنكسر
إن لمسني حزنك الطاغي
بغطي وجهي الوجل بيدي
وجرحيني .. جرحي .. جرحي
ثم ابعدي
ريحي الصمت بكلام
آه .. لو كلمة ملام
إرجعي تحت الظلام .. عوَّدي
في سنا القلب اللي توه يحترق
غمضت أنا عيوني
غمضت أنا عيوني
ياإنت بنفترق
والله يعلم .. إني حاولت

//

عطني المحبة ..
كل المحبة .. عطني الحياه..
عطني وجودي ..
ابغى وجودي .. أعرف مداه
املا شعوري .. بالحب مره
ابغى هواكم.. حلوه ومره
وأغلى الأماني .. عاشت في غربه
ياعمر ثاني .. عطني المحبه
عطني في ليل الياس شمعه ..
وبسمة نهار..
عطني في ضياع العمر دمعه..
وسكة ودار ..
واعطيك أمل في الحب غالي ..
يصعب على غدر الليالي ..
وأغلى الأماني .. عاشت في غربه
ياعمر ثاني .. عطني المحبه

//

ظماي انت .. ومن يعشق ضماه غيري
جروحي انت .. ومن يكره دواه
اسقني لو ما ارتويت .. داوني لو ما شكيت
ماهقيت اني اعطش .. في حياتي لغيرك انت
مادريت ان مابه أغلى منك ..الا انت
ما تصور ان عيني مره تغفى وما اشوفك
ما تصور لو يطول الصمت ما اسمع حروفك
تدري احساسي بخوفي هو أماني
لما تسأل عني ليله عن مكاني
ما تصور كيف تحرقني الثواني
شمعه في ليل انتظارك..!
ياللي يسبقني زماني .. من عطش .. ليلي ونهاري
عطني موعد .. وانسى موعد
بس لا... تهجر وتبعد
يا ظما قلبي لقلبي .. وغربة اعيوني عن عيوني
وينك انت
ياترى الليله في صدري
لا ..
في جفني
لا ..
في الشعور اللي خطفني
اه ... لو تدري بشوقي
آه ... .يا ظما الدنيا بعروقي

//

أبا اتنفس دام لي بالنفس حق
ياللي قصيدي فيك من حر الأنفاس
والله يالولا عبرة الحبر الأزرق
دمـعٍ نثرته من عذابي بقرطاس
لاأقول أحبك .. لين بدموعي اشرق
وقبل الصديق يحس بي نايد الناس
إلى متى .. وصلك من العمر يسرق
دونك ودون الوصل .. بابٍ وحراس
أنا فـ جبيني الشمس تظمى .. وتعرق
وانته بشوب القيظ .. ريٍ ونسناس

//

صياح الباب يكفي لا ظهرت وبكتم صياحي
لك الله لو تبيني اصرخ حبيبي لا تهج الباب
تكلم واحرق بنار العتب طيني والواحي
عيوني لك مرايا لو تبي وافتح ضلوعي كتاب
وان مات الحكي ما عاد ينفع ضحكي ونواحي
يقولون الذي كاره يلاقي للفراق اسباب
حبيبي والوداع نعاس نجم والجفن صاحي
واحلام الرماد ولفتة تملي الدروب غياب
امانة لو عشقت في يوم غيري تذكر جراحي
ولا تترك حبيبك ما بقى للعاشقين عتاب
مفارق والذي يخليك لحظة بطفي مصباحي
تعرى الدمع ساعدني البسه الظلام ثياب

//

نشي غيظي .. سحابٍ أسودٍ في موسم الدخان
ترزم .. وأمطر بجمرٍ غدا له بالحشى صالي
غضبت .. وما دريت إن الغضب ياصاحبي إنسان
وسيمٍ مثل سلة سيف.. وقلبه أسودٍ بالي
هدمت الدار من قل الحصى لأجل أرجم الخلان
وقتلت النور .. من كثر الجفا با فارق ظلالي
وحثيت الريح..في وجه التراب وهبت القيعان
تحت أقدامي .. ومرت ديار وودعت غالي
ويوم أصحت سما نفسي .. تلفتت وصرخت .. فلان
قمر وجهك .. وشمس الدار في دمعي تغايا لي
وقفت .. وكانت الفرقا .. مشيت ولا حصل نسيان
بكيت .. ولا سقاني الدمع لا مرٍ ولا حالي
غريبٍ تزرع عيوني سراب .. وتحصد الكثبان
وحيدٍ مثل رسمٍ مبطيٍ في صحصحٍ خالي

//

تسجيل دخول