بعض جيل اليوم

اخواني أسمحولي بهذه الأبيات أن أضعها بين أيديكم لو إن فيها قسوه على البعض من جيل
اليوم وهم قله جداً والحمد لله الله يصلحهم ويهديهم


الجيل الاول راح ماعاد من جيل
ماغير جيلٍ مثل فلم الأشاعه

ياليت يرجع وقت هاك الرجاجيل
ويشوف جيل اليوم ماله مناعه

اللي ورا التقليع دل المهابيل
ماذاقوا الفاقه وطعم المجاعه

من يوم واحدهم يفتح فتدليل
بارع وفالتقليد عنده براعه

ما يألفون طيور شلوى المصاقيل
يبي يجالس من يوافق طباعه

وإن صِب له دله مع البن والهيل
قال أبي كافي وأستمع للأذاعه

وإينام طول اليوم ويساري الليل
وإن نام طول في فراشه كراعه

الراس حاشه مايعود كما الذيل
كود السباع تدل طبع الظباعه

لاوالله ألا إنكان ماريع الجيل
ماعاد للتاجر طمع فالبضاعة

وماعِم جيل اليوم لو ملت بلحيل
فيهم من اللي يحفظون الوداعه

لكن ماودي يجي فالحمل ميل
وترا يد الله مع لزوم الجماعه

وأبي السموحه لو زودت فالكيل
ومالي على العربان سمعٍ وطاعه

نفاع الربيقي