دنياك مثل البحر والدين مجداف **** والعمر مركب والمقابر مواني

السلام عليكم ورحمة الله وبركاته
هذه مرثيتي في المرحوم بإذن الله تعالى عمي الشيخ محمد بن عون الله السريحي السلمي
أسأل الله أن يتقبله بقبول حسن وأن يجعل قبره روضة من رياض الجنان، فالمصاب فيه جلل ولكن لا نقول إلا ما يرضي الله" إنا لله وإنا إليه راجعون"وأتقدم بالشكر الجزيل لكل من ترحم عليه ودعا له.

[poem=font="arabic transparent,6,black,bold,normal" bkcolor="transparent" bkimage="http://www.solaim.com/vb/mwaextraedit2/backgrounds/1.gif" border="solid,4," type=0 line=0 align=center use=ex num="0,black""]

الموت للغالين بالصمت خطَّاف = ما يِدفع إليا حل وقته وحانِ
ما للبنادم عنه ملجأ ومحراف = لو ايتحصن في سهيل اليماني
لا بد يِحمل بالنعش فوق الاكتاف = وفي الارض كلٍ له مقر ومكانِ
دنياك مثل البحر والدين مجداف = والعمر مركب والمقابر مواني
ليَّه ثلاث ليال والرمش وقَّاف = النوم ما مر العيون وجفاني
أسهر مع الهاجوس واطوِّع القاف = الشعر لبَّى والقلم ما عصاني
مرحوم يا شيخ ٍ مشى درب الاسلاف = يا الله سهِّل له طريق الامانِ
عبد المجيد وعايشة وام عساف = وسلمى وبسمة وام محمد وهاني
ومتعب وابو نايف بعد وام نواف = واللي عرف طيبتك قاصي وداني
كلِّ على طاريك للدمع ذرّاف = ليت الدموع ترد لك عمر ثاني
وياليت ينفع فيك كثر التحساف = وفي رجعتك مكة تفيد الأماني
تسأل لمى عنك أمها يوم تنشاف = صورتك ثم تضمها باحتضانِ
كل المجالس عقب غيبتك تنعاف =لو كان فيها العود والزعفرانِ
هذا محمد من زبن فيه ما خاف = ربَّى اليتامى بلا فخَر وامتنانِ
بالطيب عدَّى وارتقى راس مشراف = يا لين صار يشار له بالبنانِ
ما مثله أحدٍ فالمزايا والاوصاف = من يشبهه معدوم هذا الزمانِ
شهم وكريم وداخله قلب شفَّاف = قويّ باسه لكن الصدر حاني
مثل الكتاب بلا تجاليد وغلاف = اللي بقلبه ينطقه باللسانِ
والله لو الطيب ينبت بالارياف = ليصير قبره روضة أسمى المعاني
جعل السحاب اللي به البرق رفراف = يمطر على قبره عداد الثواني
يا الله يا عالم بمكنون الأجواف = يا سامع ٍ خلقه بلا ترجمانِ
امن النعيم اجعل له فراش ولحاف = في جنة الفردوس بأعلى الجنانِ

[/poem]

\7