سدرة العشّاق

السلام عليكم ورحمة الله وبركاته





آخر ما كتبت ،، ارجو ان يكون النص في مستوى ذوائقكم
أعضاء ومرتادين،،

محبتي لكم مقدما



،
،
( سدرة العشاق )





من سدرة العشاق طلّي يا عصافير الرحيل
حتى متى جدب الحنايا تنتظر وصْل المطر





مدت يدين الغيم ماتروي عطش للمستخيل
حتى ولو لخّص كتاب العمركله في سطر !





شوفي بقايا دمعتين وكلمتين اكبر دليل
ان الفؤاد اللي سكنتي به من الشوق انفطر





أذكر وانا اهز الغصن طار الحمام بْلا هديل
يمكن يحس ان اهتزاز الغصن ينذر بالخطر





ما يدري انه كلما بلّ السهاد اطراف ليل
سال الحنين بْوادي اجفوني وذكّرني عطر





كان يتسربلني شذاه ليا بدا نفحه يسيل
ولا يزال اطيب عبير اللي على بالي خطر





من وين ما هب الهوى عاكست نسمات العليل
ومن وين ما طاح الندى فتشت حبات القطر





كم جرّح التغريد سيقان السنابل والنخيل
لين الصدى فجّ السحاب وباقي الصوت انشطر





ليت الثريا تجمع الشطرين و تخبّر سهيل
العزف متهدّج نتيجة شوق ما هو من بِطَر





يا سدرة العشاق لو مرت عصافير الرحيل
قولي لها كل الحنايا تنتظر وصْل وْ مطر





وسلامتكم
جابر السلمي