غيث السعد.

غيث السعد
أهدي هذه القصيدة إلى أخي عوض حامد الزبدي الحارثي وإلى كل ذي مجد وخير ووفاء وصفاء
(( مقبول مبارك العرابي 12-10-1433هـ )).
1- سلام تسليم الوفا والغلا من قلب ولسان = أنصى به الوافين وأهل الغلا فالكون كله
2- اللي مبانيهم رست فوق عز الساس وأركان = وأركان قصر العز من فوق سيسانه تقله
3- اللي يشرف فعلهم كل حر بْكل ميدان = سيف الفخر والفيد كل(ن)على الجزلة يسله
4- يشوش راس الحر لا خال خايل غر الأمزان = خايل مزونه للصفا والمراجل مستهلة
5- خايل ليا خيل ديار(ن) بها حفة وحرمان = غيث السعد من فوقها هل و المعقود حله
6- غيث(ن)يلين الصخر من طيبه وتخضرالأغصان = وزين الثمرمن كل الأغصان يرسي في محله
7- خايل بصدق وجد للخير والقالات نشطان = ولو شاف باقي حفة بغصن غيثه جا وعله
8- ماهو سحابة صيف تطرد ورا سمعة وخسران = برق ورعد والخير فوق البسيطة ماتهله
9- مابه بها إلا الوجهنة والمهايط والتمحان = تفرى الجروح وسمها بالعسل دايم تبله
10- ولْيا انطفت دخان دخن بها فالليل دخان = حتى مابين الأهل دخانها عيت تمله
11- يالله تقطع كل مجرم ومتوجهن وفتان = وراعي الغلا والخير يالله لأهل الخير خله
12- سوات ابن حامد عوض والنعم به طير حوران = نسل الحرار وشيخ كل(ن) في العليا يدله
13- شيخ(ن) من أركان القبيلة رفيع القدر والشان = العز لبسه والصفا والوفا والخير دله
14- لْيا طرى طاريه وأنا أذكره مابين الأخوان = يشوش راسي وأفتخر به وأجل اللي يجله
15- بالصدق والإخلاص والطيب يزرع بر ميسان = مايزرع الخرمان ويحط وسط البطن علة
16- من روس أبالحارث هل الطايلة في كل ميدان = ومن روس ألاد زبيد تاج الفخر والعز كله
17- وخْتامها ياسامعي ماش غيث بْدون ربان = وصلوا على المختار والخير ذكره مانمله