ديوان الشاعر / عبــــدالله الصــــالحي

كتبت هذه القصيده رداً على قصيده وردت لي من احد الشعراء المقربين لنفسي .

غـــــــــوص البحــــــــــــــور

[poem=font=",6,darkblue,normal,normal" bkcolor="transparent" bkimage="" border="none,4," type=1 line=1 align=center use=sp num="0,black""]
ياهاجسي جاك الشعر في غبة بحور الخليل=ولأجل الشعر ساطي على غوص البحور الهايله
تستخرج الفكره من الاعماق كالدر الاصيل=وتكسيها بالمعنى الفريد وتضمها جزايله
ومياه البحور المالحه صارت بطعم السلسبيل=ورسمت في شطأنها بيت القصيد وقايله
تستنهض الهمه طرب وتثور فالجسم النحيل=حتى يشعشع نورها فوق الصروح الآيله
يعني بدون مبالغه في هالزمن مالك مثيل=السهل ما تستسهله والصعب دايم نايله
ومهما يحط من الرزايا وقتنا والا يشيل=هذا هو نهج الزمان اللي نصب حبايله
طبع الرجال الوافيه ماتشكي الحمل الثقيل=ترسي لحمل الكايده والمستحيل تحايله
ماهي سوى في طبعها مع راعي الفهم القليل=اللي عمت عينه يده وكبده شكت غلايله
والله جعل شمس الضحى شاهد على الظل ودليل=والرجل قوله تكذّبه وتصدّقه عمايله
ومن يجحد المعروف مايستاهل الشكر الجزيل=إنسى غلاه ان كان لا هالحين قلبك شايله
وراع الوفا لا قفت ركابه ترى ماله بديل=واكثر مايشكي غيبته وتفقده حمايله
والوقت يمضي والليال تدور ياعابر سبيل=وسر الليال القادمه تقراه من دلايله
[/poem]

هـامتي فــوق

[poem=font=",6,darkblue,normal,normal" bkcolor="transparent" bkimage="" border="none,4," type=3 line=1 align=center use=sp num="0,black""]
دارت رحاي وخلة الحَب مدقوق=وعرفت خلي من طوارق لحونه

بينه وبين الناس تبدي لي فروق=أعرفه انا والناس مايعرفونه

ياما وياما كم كحلت له موق=وقطفت له حب العنب من غصونه

تلومه العذّال في حبه النوق=ليت العواذل فالهوى يتركونه


قبلك على هالباب يالعاذل طروق=ماردوا العشاق عن مايبونه

معذور ياخلٍ تربى على البوق=لو قال ماشفنا مطر في مزونه

مزنٍ على رعّادها برقها سبوق=وناسٍ تكذّب كل مايجهلونه

ياسامعي هاكم من العلم معذوق=لعل عرّاف الزمن يفهمونه

علمٍ اقوله عندي لصدقه وثوق=من يسمعه كنّه يشوف بعيونه

اموت انا ياصاحبي وهامتي فوق=وتموت حسّادي بحسدها مغبونه

هذا القدر ساقك على مانبي سوق=وعرّفك وشمعنىرفيقك تخونه

الشمس دايم يتبع غيابها شروق=سبحان من صرّف بالاقدار كونه

مايصدُق الكاذب لو يكذب صدوق=ولا يكذب الصادق لو يكذبونه

في هالزمن تزرع خزامى ورقروق=ويجون ناسٍ فالخفا يحصدونه
[/poem]

سُحب الظنون

[poem=font=",6,darkblue,normal,normal" bkcolor="transparent" bkimage="" border="none,4," type=2 line=1 align=center use=sp num="0,black""]
خيّلت سُحب الظنون وكاذب البرّاق لاح=وأمطرت سود النوايا وبلها بلايّ رعد
وارتوى سرابها من وبلها لين استباح=طيبت القلب الرحيم وغرّها بكثر الوعد
وارتمى في حظها من ساقته صلف الرياح=لين شالت مركبه عن الحقيقه وابتعد
أشعلت شمعه في ظلام الليل من عين الصباح=عشان ابنثر حلمي الطاهر على وجه السعد
وابغاك تستمطر صدوق النو للنبع القراح=وتزرع على حوضه بذور العلم وتحصده بعد
من يسلّ السيف من غمده ويكسر به جناح=ما ارتقى فِكره لعال المجد ولا هو مستعد
ومن يدوّر رغد عيشٍ بين كفينٍ شحاح=فالرحله اللي بالشتا والصيف ليته ماصعد
ومن يدوّر للفشل عشان يزرع به نجاح=ليه تقلع نبتته كف الرعايه ياسعد
ولا يلام الرجل لا منّه طلب شيٍ مباح=دام عزمه مقبره للياس وقلبه ما ارتعد
أقولها كلمه صريحه واضحه تطلق صراح=هرجةٍ في خاطري لو كان عندك ماتعد
[/poem]

درب الخطأ

[poem=font=",6,darkblue,normal,normal" bkcolor="transparent" bkimage="" border="none,4," type=1 line=1 align=center use=sp num="0,black""]
إشرب ظما ياراكضٍ خلف السراب=واكحل عيونك من سنا وهج الهجير
وليا إرتويت من الضما أسق السحاب=من وابل الحزن المخيم بالضمير
واستمطر الاشواق من سحب العذاب=لشجون قلبٍ هاله اليوم العسير
وياللي جمعت الصبر من روس الحراب=شوف الوفا من كيدهم بك يستجير
كلٍ لغدره سل سيف وحد ناب=وأضمر بوسط القلب شرٍ مستطير
وصارت وجيه الناس للنيه كتاب=يقرا حروفه راعي العقل البصير
وعذب الكلام اللي منول يستطاب=اليوم وقعه فالمسامع زمهرير
هذا القدر ياصاحبي سيف الرقاب=لا حل ماينفع مفر منه ومطير
ولا من نور الشمس عن الارض غاب=يفْقدْه من كبد السما الرجل البصير
ولا ينفعك كثر الملامه والعتاب=لو ماسأل عن غيبته رجلٍ ضرير
والسيف تعرف قيمته وقت الصعاب=لا كثرت سهوم العدا وقَلّ النصير
إشرب ضما ولا جفا ولا إكتئاب=من هو سلك درب الخطا هذا المصير
[/poem]

يادرب

[poem=font=",6,darkblue,normal,normal" bkcolor="transparent" bkimage="" border="none,4," type=1 line=1 align=center use=sp num="0,black""]
يادرب في سود الليالي مشيتك=اليوم في ممشاك معاد لي شف
الهاجس اللي شب فيّ وسريتك=صالي هواه اليوم عن خاطري كف
وليا ذكرني هاجسي مانسيتك=أُسكب شقاك بكاس والصبر يرشف
ولو طال بيّ ممشاك..لا..ماشكيتك=تثمر تعب ليه وانا اقول لك وف
لولا هذه نهجي معك ما طويتك=ويمدي جميل الصبر عن خوتي عف
[/poem]

فجر الشعر

[poem=font=",6,darkblue,normal,normal" bkcolor="transparent" bkimage="" border="none,4," type=1 line=1 align=center use=sp num="0,black""]
سلام قاله قلب للشّعر مفتاق=لقلبٍ أعرفه فيه للشعر فاقه
فجر الشعر شعشع ومن قلبي انساق=عساه يلقى فيك للنور طاقه
والنور له سلطه على ليل غساق=تنطق بها سدوله بوجه احتراقه
وقّفت هاجوسي على ركبه وساق=يجمع لكم من واحة الشعر باقه
رحيقها يروي شغف كل الاذواق=وتحلّق الفرحه طرب في نطاقه
وتعانق حروفه صفا بيض الاوراق=وترجّعه غبت بحر من زراقه
يقول من باله نسى همه وراق=وصارت ترانيم الشعر له عشاقه
العام صِغْر الكون في عيني وضاق=واليوم ياكبره وياوسع آفاقه
صِغْر الفضا يوم القدر صاب الاحداق=وسبب لها سهمه عن الشوف إعاقه
وسِعت آفاقه بعد ما لاح براق=بانت أسارير الفرح في شعاقه
تجذب دلي الحزن من جوف الاعماق=وزفرت لهيب الصدر تطلق وثاقه
وقلبٍ به غراب الجفا دوم نعاق=ولاله مع قروم الرجال إنطلاقه
ودك تبيعه لو ماخفت الاملاق=وأسعد خبر لا بشروك بفراقه
ومن لا صفعَت وجهه الايام بطراق=أكيد تطرد فرحته بانطراقه
ومن طول ليله مايتهقوى له إشراق=ويشوف بين الليل وموته علاقه
هذا هو الفحص الحقيقي للاخلاق=ونتيجته ما تنكتب في بطاقه
تبان لا نشفت ويبسن الارياق=وهانت على بعض الرجال الرفاقه
يقصر بها عنقه ليا طالت عناق=وشالت عن الحمل الثقيل الوساقه
ورد الجميله صعبٍ ودربها شاق=لكن مذهب لي أحب اعتناقه
ولا أحكمت عن شعري ونوره الاغلاق=خالفت باسلوبك أصول اللباقه



[/poem]

نذير شؤم

[poem=font=",6,darkblue,normal,normal" bkcolor="transparent" bkimage="" border="none,4," type=1 line=1 align=center use=sp num="0,black""]
غيم الامل من عام في عيوني التم=وأسهرت قلبي في حراوي ثعوله
لا باينت شمسه ولا ليله أعتم=ولا فكّت يدينه سحايب خجوله
أنساه والاّ أرجيه ولوصله أهتم=لو خيل صبري من الرجاوي جفوله
الى متى ياصاح والقلب يكتم=ونذير شؤم فيه يقرع طبوله
وصل الأمل ممكن متى ما أرتم=حفظ الوفا من غدر يمنى خطوله
وقطعه بسكين الغدر لا عبثتم=بمعنى الوفا يا لابسين الرجوله
برج الغلا شيّد لنا ووشك يتم=لو صد قلبك عن ظنون هتفوله
واليوم شوف الهجر وشلون يشتم=إخلاص لك فالقلب عيا يطوله
بإسم الوفا والطيب تعال نختم=وعدٍ قطعته قبل تصعب حلوله
[/poem]

عـــد الــــروى

[poem=font=",6,darkblue,normal,normal" bkcolor="transparent" bkimage="" border="none,4," type=1 line=1 align=center use=sp num="0,black""]
أشوف عينك تكثر بلدّها شرق=وشمسك من احكام القدر مايله غرب
والعمر بين ايامه وليالها فرق=مايعرفه الا رجل عاقل وذرب
ليه الخفوق يفزّ مع نايض البرق=ورجلك لوقع النو ماتعرف الدرب
وليه المسامع تطرب لنايح الورق=مدام عينك ماترجّى لها قرب
ومن حاز له دره لكن جابها سرق=مايفتخر فيها على مجمع العُرب
وعد الروى من ذاق في مويته طرق=لو اغتسل منها يبي يعافها شُرب
ومن جوّدت في كبده ايامه الحرق=لايشتكي الا على فارج الكرب
أقولها من فاير الدم فالعرق=مما سمعت وشفت من ساير الغُرب
[/poem]

الشــــفـق

[poem=font=",6,darkblue,normal,normal" bkcolor="transparent" bkimage="" border="none,4," type=1 line=1 align=center use=sp num="0,black""]
غابت الشمس عنا والدليل الشفق=هلّ دمعٍ بلون الدم لغيابها
واجتمع موكب أحزانه وسدّ الأفق=وقدّم التعزيه للارض في مصابها
ومن كثر حزنه على شمس الحقيقه نفق=يوم شاف الظلام يقيّض اطنابها
عتمة الليل ماتشبه ظلام النفق=تسرق الشوف من عينٍ يحلابها
لو قلبك على عوج الحنايا رفق=ماشكت عينك الجفوه من أهدابها
ولو طيرك تعلّى وبجناحه خفق=نظرته دايمٍ للارض وترابها
ومدام حظك مع أحزان الزمان إتفق=خلّ بيض الاماني تنوّخ ركابها
[/poem]

بــــــريــــــــــق الســــــــــــراب

[poem=font=",6,darkblue,normal,normal" bkcolor="transparent" bkimage="" border="none,4," type=2 line=1 align=center use=sp num="0,black""]
بعد صبري تغذّى سٌقم جرحٍ عميق=مات بي كل جرحٍ كان مايرحما
وجيت أبطرد سرابك بعد جاله بريق=قبل لاترمقه نظرات عين الظمى
جيت أبنقذ من الاوهام نفس الغريق=وأرفعه فوق غيمه في عنان السما
جيت أبسلك لرجلي فالمتاهه طريق=وأستلف من بصر عيني لعين العمى
نظرتي للحياه بعين حٌرٍ طليق=كل ماشان وجه الارض عنها سما
والبحر ماهجر موجه عشان المضيق=ولا شال هم الجبال اللي عليها طََمى
والمطر في علو المزن مابل ريق=ولايفيد السحاب اللي تعدّى الحمى
والنفس تستدرج اللي في نظرها يليق=ولا كل شمسٍ تبدد ليلها المظلما
عذرت حال الزفير اللي يتابع شهيق=وغفرت ذنبٍ على كفين طاعه نما
لعل من شب ناره في يدينه يفيق=قبل تصبح عيونه للندامه فمى
ولو فعل الصواب من الخطأ مايضيق=كان الخطأ من العداله بالصواب إحتمى
الورد من طيبته يغري النحل بالرحيق=ولا سأل من عبث في غصن ورده لما"؟
[/poem]