ديوان ( همـس السلسبـيـل )

بصمة شاعر
..........

العطا نبعه بكف الجود جفّي
والوفا ماعاد تحميه الحصَانة

لو نقول ولو كتبنا كم نخفّي
عن اذان الشامت بصمتي رزانه

في ضلوعي نار ودموعي تطفّي
بصمة الشاعر يوضحها****** لسانه

لي صديق رضاه مقصودي وشفّي
شيخ يبهر لن تحدث في بيانه

ياولد عبدالعزيز اسمك يكفّي
الرواسي ما استعدت للأمانة

طال صبري وانت ياخالد مقفّي
والمصيبة من شيوخ ولك مكانه

والله اني معتبر كفك بكفّي
وانت اخوي من القبيلة والديانة

واعتبرك انك يابو فارس بصفّي
افتخر فيك وبقلبي لك ميانة

كل يوم انا انتظر بشرى تزفّي
سلسبيل الهمس تدخل فالخزانة

(قصيدة الشاعر /عيد حبيب الفقيه)

سلام تسليمٍ يعمّ العطاطيف
* والكل منهم ياصله عند بابه
عداد همال المزون المراديف
* ومن زار بيت الله وطاف وسعى به
العزوة اللي تكرم الجار والضيف
* طيب وكرم وأخلاق مابه غرابة
وكل القبايل نعم والهم مواقيف
* فالسلم سلم وفالحرابة حرابه
هذا كلام الصدق مافيه تزييف
* ودايم كلام الصدق يحسب حسابه
وعبدالله بن وصل صاحب معاريف
* ياسعد منهو فاللزوم اعتزابه
شاعر كبير يصرّف الشعر تصريف
* يحكم بيوت الشعر في كل جابه
وابو عناد يوظّف البيت توظيف
* واسمه هلال الشعر قدر ومهابه
يعسّفون أبيات الأشعار تعسيف
* حتى تطيع وتنخضع للكتابه
وجميع من جاء شرّف الحفل تشريف
* شعّار وأنساب وضيوف وقرابه


(قصيدة الشاعر/هليل سليمان العطافي)

بسم الذي يجمع قلوب المواليف
راع الوفا والطيب يامرحبابه

يامرحبا ترحيب ماله تواصيف
واهلا عدد ماهل وبل السحابة

برق ورعد وبْله من السِيف للسِيف
بين القلوب العاشقة ينحكا به

عامين متواصل لبرقه رفاريف
والارض بالازهار والنبت غابة

والجو كنه جو باريس وجنيف
جو الشعر بعد الحكيم اعتنا به

بالصافي الوافي وسيع المحاريف
اللي على نهج النبي والصحابة

شاعر يكيّف عاشق الشعر تكيّيف
ياسعد من وقت اللزوم انتخا به

عيدالحبيب كلمته كنها السيف
عز الصديق وللعدو يندعى به

شيخٍ ينَتف لحية الشر تنتيف
وفي قمة الأمجاد راكز حرابه

مطنوخ صادق مايحسب التكاليف
لن حط في باله هدف غصب جابه

العود الأزرق والتراحيب والكيف
كريم لو الوقت له حد نابه

من عزوةٍ مثل السيوف المراهيف
اهل الكرم والشعر واهل الخطابة

مثل الجبال تصد صلف العواصيف
وصدورهم فيها زيادة رحابة

عدوهم عنده يصير الشتا صيف
والنور والظلما لايمكن تشابه

( ما طحت من عيني )



اصُب لك عَذب القصيد وتقهوى
واشعل من افكاري للابداع مصباح

على ضفاف الفكر الابيات نشوى
ومن حولي العالم خيالات واشباح

من بلسم الابداع للشعر سَقوى
كلمات سهلة لكن الحرف سفّاح

عقل الرَجُل ميزان والنفس تهوى
وش تحتري والشيب في عارضك لاح

اجعل لك مع الله في الليل نجوى
لو نصف ساعة بين دعوة ومسباح

وكبّر وهلل وارفع ايديك شكوى
تُفتح لك ابواب السعادة والافراح

اذا اجتمع مع حُسن الاخلاق تقوى
وبدت بجَلد الذات لحظات الاصلاح

ابشر ترى بحر الأمل فيه رجوى
لو كُنت ماانت لبحر الامآل سبّاح

من كل حَيل وحول حول الله اقوى
سبحان من يجمع على الحُب الارواح

تموت زهرة حِلم وتخيب هقوى
وكم واحدٍ قبلك بعد نرفعه طاح

ماطحت من عيني على شي يسوى
دمع اليتيم اصدق من دموع تمساح

بالخطوة اهوال المسافات تطّوى
وبعض الخسارة تعتبر للفتى ارباح

الصاحب الساحب لك اضل واغوى
والصاحب العاقل معه دوم ترتاح

وطارد سراب اللال وش لون يروى
ماترتفع ياطير لو مالك جناح

بسْمَات فيها ...****** خُبث نية وبلوى
وبسْمَات فيها صافي الصدق وضّاح

ونظرات سحرية من عيون غفوى
فيهاجيوش سهوم . وسيوف ورماح

وكلمات ذبّاحة من قلوب صفوى
وكلمات عفوية . بها الهم ينزاح

تمرض بلا عَدوى وتمرض بعَدوى
وقلبك عدد نبضاته آهآت وجراح

مافيه احد يختار الاقدار نقوى
والصبر لابواب الفرج خير مفتاح


اصُب لك عَذب القصيد وتقهوى
واشعل من افكاري للابداع مصباح

بسم الله ابدى وكل الخلق لله عبيد
وصلاة ربي على المختار خير البشر

والحمدلله على النعمة وهل من مزيد
امن وامان ونعم بلا حدود وحصر

سلام من شاعرٍ يعشق جزال القصيد
ويعشق هل الدين والاخلاق بدو وحضر

انا هنا يامحبين الجزل والجديد
ناقدوشاعرفصيح لسان واقدح سطر

فالشعرجاوزت ابو الطيب وقبله لبيد
وجاوزت بالمنزلة حدود الجدي والقمر

الشعر ياعاشقين الجزل اكرر واعيد
بالمختصر عن كثير الشعر يكفي شطر

يسمح لي الراقي ويسمح كمان العميد
اقول جدة كذا ابو عناد وبحر

جدة كذا غير وانا غير هذا الاكيد
انظم حروف القصايد مثل نظم الدرر

اهلاً بضيف السعد قريب والا بعيد
الضيف له عندنا منزال فخم وقدر

عزاز صاحي وابوقاسم والاستاذ عيد
يقلون يامرحبا مليار باللي حضر

الشيخ عزاز كاسب نعم والله شهيد
بالخير مذكور دوم ان غاب والا حضر

عزاز وصى عياله ثم وصى الحفيد
وصاهم بطاعة الله ثم ولاة الامر

وزيد الشنيني كأنه خالد ابن الوليد
حكيم امين وشجاع وفيه حلم وصبر

مذكور بالخير كاسب نعم فعله حميد
كل الصفات الحميدة فيه سر وجهر

مبروك لك ياسعد عزاز جعلك سعيد
عساك دايم سعيد وماتشوف الكدر

وياعيد عزاز ياستاذ الكلام المفيد
في مدحكم ياطويل العمر مالي عذر

ومبروك ياقاسم الشهم الشجاع الفريد
الليلة احلى الليالي صدق ليلة عمر

وذوي سعادة رصيداللي ماعنده رصيد
ذوي سعادة سحابٍ بالعطايا انهمر

ذوي سعادة شيوخ مطوعين العنيد
شجعان عز الخوي واهل الكرم والظفر

اخلاق دين وشجاعة واهل رايٍ سديد
ذوي سعادةحزام وتاج راس وفخر

ذوي سعادة اهل مجدٍ عظيمٍ تليد
حنا السلاطين والحسّاد ماتوا قهر

فالسلم سلم ولنا فالحرب باسٍ شديد
عدونا نجعله عبره** لمن يعتبر

الرجل منا بصعبات المواقف عقيد
يذلل الكايدات ومايهاب الخطر

وعن نهج خير البشرمهماحصل مانحيد
حنا هل الاولة والنعم بالمختصر

وربعي عطاطيف يجري حبهم فالوريد
ياتاج راسي يابن عطاف تامر امر

صلوا على محمد الشفيع يوم الوعيد
صلوا على محمدالمختار خير البشر

وختامها مرحبا مليار اكرر واعيد
يامرحبا مرحبامليار باللي حضر

......

اليتيمة

من سحاب أفكار شاعر . كنز الابيات الحكيمة
استهلت غيثها يروي عطش من هو سمعها

النوايا البيض تشبه همسة الفجر ونسيمه
عطرها الفوّاح له بصمة على الخافق طبعها

والدموع اللي لها في خافقي حشمة وقيمة
تشبه جنيهات شايب من صغر سنه جمعها

التجارب علمتني . (كل دقة بتعليمة )
والحياة دروس والدنيا كفانا الله طمعها

حالتي حالة طفل مطنوخ تصميم وعزيمة
يضرب الكايد بكف لغير ربه مارفعها

بطشناماله حدود أسودمانرضى الهزيمة
ماانحنى راسي لغير الله في ركعة ركعها

كلمايزرع فؤادي وصل . والنية سليمة
يحصد أشواك الخيانة والغدر والغش معها

وكلما يعفو ويصفح جاه طعنة في صميمة
وكلما يبني جسور الخير قال الحظ دعها

من براكين المواجع ينتثردمع اليتيمة
استباحت دولة الصبر الجميل بمجتمعها

تكسر الخاطر قلوب . تصافح أيادي لئيمة
مالها حيلة . وطوفان المصايب يقتلعها

العيون اغرورقت . تستفزع قلوبٍ رحيمة
واجمل اللحظات تنزف خوف مايهدا فزعها

كلما انظر في عيون الكون والناس الحليمة
اكتشف نظرةْ عتب بعيونها . العالم زرعها

صرت اراعيها واحَصّنهاواناديها عظيمة
واتوارى عن سوالفها واسافر مع ورعها

يعتصر لفراقها قلبي وطعنتها أليمة
اشغلتني بين بسمتها وقسوتها ودلعها

الحكاية حركت في داخلي ذكرى قديمة
الجروح اللي تحت سابع ثرى دافن جزعها

في ملامح حد سيف الحاسد آثار الجريمة
لو على كيفه جسدك العافية منه انتزعها

ولوعلى كيفه حذفك مع الشياطين الرجيمة
ولو بكيفه رحمة الرحمن لو يقدر منعها

1/ترخص الارواح والغالي عشانك
ياوطنا ارواحنا لجلك هدية

2/من مدحك نقول صح الله لسانك
ومن هجاك أكيد في النار اللظية

3/دام عزك ياوطن وآمنك وامانك
تحت حكم اهل السيوف الصيرمية

4/في ذرا آل سعود يغمرنا حنانك
انتهى بالعلم عصر الجاهلية

5/يالملك سلمان فالخافق مكانك
خادم البيتين وعزومك قوية

6/لو بغيت يحرك العالم بنانك
قدوتك يا ابو فهد خيرالبرية

7/معتلي يا ابوفهد بالدين شانك
والدعا بالخير لك صبح وعشية

8/هيبتك ماهي لغيرك في زمانك
تدعس خشوم الطغاه العالمية

9/ناصر المظلوم من بعد استعانك
وانتهى حلم الكلاب الفارسية

10/العذاب لمن يخون الله وخانك
والفخر لجنودنا والنار حية

11/وياعميل إيران رب البيت اهانك
اشهد انك ياحمد شر البلية

12/وسوس الشيطان لك زوّد جنانك
واحترقت بنارك وشعبك ضحية

13/لاتحاول ضدنا تسرج حصانك
نقطف انفاسك بحد النافعية

14/ودام عزك ياوطن وآمنك وامانك
تحت حكم اهل السيوف الصيرمية