|
#1
04-25-2012, 01:36 AM
|
||||
|
||||
شاعرنا لمباركي يصف رحلة صحراوية
بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين جولة في صحرائنا يا سمعني كانك تهوى الخطرا * اتونسني ورادفك نقداواثنين انديرو جوله مليحه فصحرا * فوڨ أجواد امخيرو ومصيل زين صيلو عربي كان فالي للظهرا * وسط المرجه مادخلش الكوري شين ومحجل ملربعه سارع قدرا * من نوع انكسبوه منا خيالين سرجو ضاوي ناقشينو بمهرا * بالنجمه وهلال بانو وقادين أفراش السرج امخيرو موله خبرا * تحتو طرحه طابعاتو علجنبين وركابو مصنوع فضه مشهورا * ولجامو معدول فشده ويلين وصراعات موزقه دارا دارا * موزقها فنان في عملو بيدين وحزاموا تحت اسدر عامل دورا * والخمسه وسط اجبين تنح العين والدير اعلى رﭬبتو داير مارا * وسبيبو عليمنه طايح بلعين والتصميرا جديد ركابو سيرا * واجد عودي والف الخطرا ومهين انفزوا قبل الصلاة مع البكرا * ونوريه ولايتي وأهل التﭬمين انزوروا فيها قواشي مذكورا * ونشفوهم فلمدن والنقالين ما يحـﭬرش انزيهم قوم النعرا * وهاذي عاده فلعرب مند سنين اوصلنا قبل العشا درنا زقرا * بتنا نحكوا والسوامر شعالين بجناب وملفوف وجماعه دايرا * واحنا نحكوا والحطب منو سرﭬين واعشنا ملفوف فوڨ المجمورا * وشي الحطب ايزيد فلبنه نصين ومعاه المطلوع مخبوز البرا * وﭬمح الصحرا شاكرينو وكالين لمصور معروف وجبه مشهورا * وطيابو فوڨ الحطب ومداوي زين ومن بعدو مسفوف فتلاتو حرا * ومسـﭬـي بدهان وعسل حر بنين وبالقهوه والشاي تكمال السهرا * وبالشعر رجالوا يباتوا ﭬصارين بتنا نحكوا في اخياما مستورا * وبحديث الميعاد يبرى كل حزين يا حصراه عللخيام اللي حمرا * ويا حصراه على البدو الرحالين يا مزين مرحولهم وقت الخطرا * بيه ايطوفو علوطن يسرا ويمين والصرعوفه صوتها عندو نـﭬرا * وصوت الـﭬصبه زادها تحفه وحنين أمات اللقو صياحها صوتوا سرا * عللخرفإن اللي عليها مرسيين أنياﭬا حنت علمخاليل العطرا * وخيلا تصهل في رتبهم مربوطين اصيادت لرنب والحجل ثم حبرا * ولصيد الغزلان لازم وحايين صيدو صاعب ليه صاﭬه منتشرا * حيحايه برودها كاسح ومكين ولباس الميعاد وبرى للشهرا * تحتو لبيض فيه مسعد منسوجين والـﭬندوره نايلي ورقه حرا * وعمامه بيضاء أماتر محسوبين والعربي كوستيم كامل للسترا * ونوي خيطو علعمامه لفراسين وألبست اتقاشير لكراعو سترا * وعكازه فليمنه ﭬالش سكين ومظلو معدول نواه اللورا * ولمكردي صباط شركو بان متين وﭬرابوا مليان ومعاه جبيرا * كل أسبوع ايجو رجالو سواﭬين والبلقه صباط ما فيه سيورا * يلبسها من دار بست اعللكرعين واذا جا سواڨ منهم للدشرا * مصاريف الضيف عنها متفقين وماكلهم علحطب ﭬاع مسرا * مهيش اعللـﭬاز قرعه وبادين وﭬصاع الطعام للقاشي عشرا * كل آخر عظموا ﭬبالو معروفين كل أخر سهموا ﭬبالو لا هدرا * والحوته وسط لـﭬصاع الممليين وﭬدحيات من اللبن ماهي قبرا * ميش اللحظه المنتنه وسط كراطين ولي ﭬـفص أمن اجبن فقرا فقرا * مهوش الفرماج مخدوم بعامين والشخشوخه و ادهان مع الكسرا * ورب العكه يفطرو بيه القصبين بوكعوا له بنتو فيه احرار * بوصلوع ارفيس عند زوج اسمين دﭬـلة نور يﭬدموها والتمرا * وﭬد حيات من اللبن ول من اشنين ماهم صافي في عيون وفـﭬرا * ولحم الأدمى والفشتال وبوﭬرنين ذي عادات جدودنا راجل ومرا * ويمتازوا بلباسهم حتى انساوين نبدالك بالملحفه والـﭬندورا * والحولي والشد والخمري ساترين والبثرور مدربياتو وظفيرا * ودارت خاتم والخمس منـﭬاش ثمين والصرع على جيدها طالع شعرا * ريحة مسك معاه عنبر فواحين والشركه وسخاب فالرﭬبه برا * ريحه فاحت ماعرفتش روحي وين واحدايد فلييد والمدور درا * مشية لدمي فصحر شارد ومهين هذه عادات لينا حاضرا * وتبعنا ها للوصيه طباقين مانذيش اللي يجاورنا عرا * واللي جانا بالقدر عندو قدرين يعرفنا من جال ما فينا غدرا * وما تلـﭬـى فينا ابخيل ولا نقصين كلمة عيبي باقيه فينا سيرا * علمنا ها للذاراري وصايين والبدوي في خزرتو تلـﭬـى عبرا * صابر شاكر خالقو راضي ومين ما يمكر مثل العباد المكرا * وعدو صادق علكلام ايدير الدين مايعرف نفاق لا مناورا * ديمه جدي في كلامو صح أمكين والبدوي لولاتو يعطي إشارا * تعليمات ايطبقوها محترمين والبدويه فلعرب زينة عشرا * مشهوره بخلاقها علحضريين مادخلتش المدرسه ما هي تقرا * تعرف للميعاد والخلق الحسين جملت بعض من الحيا شهمه حرا * والطاعه للزوج ومعاه البوين هذه نبذه علعرب قاش النصرا * وتوضيحات تفيد من هم سوالين واللي شك إيجي هنا يعمل دورا * ويلـﭬـى اللي ﭬلناه ثابت ببراهين عودي طاح من التعب وشخر شخرا * يتألم بيه التعب واهن مسكين هذا بر بعيد موسعها صحرا * طفنا بيه تراب سته وتلاثين منطح راسوا للسما دابك خزرا * ينهج يلهث والعرڨ كاسيه ينين قبلتوا للراس وحفرت الحفرا * ودعتو ودموع عيني جرايين ولو ما جاش حرام وتولي كفرا * نفدي عودي نختم عليه الستين وندفن جسمو في تراب المقبرا * ونبني ﭬبرو بالجواهر ومراجين ونصنعلو تمثال يتخلد ذكرا * يبان يوقد والشواهد لماعين يساهل ذا العود تبقالو مارا * مثلو عودي عود عنتر شباهين ولى عود اللي امسمي حيدارا * صابر صبروا كي الخيل المشكوريــــن ﭬلت أندونها هنا تبقى ذكرا * يتفكروها ناس بينا مهتمين للي مشاف بلادنا عنها يقرا * يتمتع بشعارنا يعرفنا وين كلمات الشاعر لمباركي بلحاج مسعد – الجلفة 
|
«
الموضوع السابق
|
الموضوع التالي
»
العرض الشجري
تعليمات المشاركة
|
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك
BB code is متاحة
الابتسامات متاحة
كود [IMG] متاحة
كود HTML معطلة
|
|
|
الساعة الآن 03:42 AM.
