الماضي والحاضر والمجهول

(الماضي الحاضر والمجهول)


ماعندنا في قديم الوقت مطاره
قربه تسد العرب جمعه وليلتها

واليوم وايت يروح جوف بياره
والتحلية ماتداوم لك محطتها

ولاعندنا مثل هذا الوقت سياره
جمالنا ماتوانا دون حملتها

والجار ماينقطع لو يوم عن جاره
ماغير الوقت مثل اليوم فطرتها

واليوم نسكن عماير في وسط حاره
ماتدري الناس من يسكن بحارتها

وياسعد من في دياره حافر بياره
لابد يومٍ يجي للبير فاقتها

من طبع الأيام لو تغريك غداره
لو طاب لك حلوها إحذر من مرارتها

وألا يا حلالاه يا ماء وادي ستاره
ذكرت عين الظبيه من حلاوتها

يوم النخل كل عامٍ نجني ثماره
من كل صوب العرب فالصيف حضرِتها

وحنا حضرنا مع الحضار حضاره
ماحضرت الناس غير لطيب تمرتها

والجمعه تمرها العربان مراره
والواسطه مثلها من فرع جارتها

ومخمره عينها بالجم مدراره
ومانسى المسماه معروفه بغلتها

واللي مسند لقى المعترضه يساره
كل الحيام الضوامي فوق جمتها

وجليله عينها بالجم فواره
تاخذ من الوادي المحبوب حصتها

إما السليم العذيه مركز أماره
تارد عليها العرب حزة طلابتها

وسايه فخر والغريف عيون جباره
والكامل العاصمه نفخر بحرتها

إحترت والناس مثلي زود محتاره
صحيح ود العرب تعرف حكايتها

ولو مالحسد عند بعض الناس والباره
ماتفقد الأرض زينتها وجنتها

الله يدبر وحنا نجهل أسراره
قدره من الله مقدرها وصابتها

ياجعلها عن ذنوب الخلق كفاره
ماياخد الناس غير ذنوب حاشتها

يمكن يطوف الزمن ويعيد تدواره
وتعود للأرض بعد عصور نُضرتها

ويمكن يخون الزمن ويعج بغباره
وتغير الشمس بعد تغيب وجهتها

دنيا تقلب على الوجهين مكاره
والمسعد اللي سلم منها ومكرتها

يقولها اللي تذكر زينة دياره
النخله اللي تجود بطيب ثمرتها

شاعر يقدم لكم بالحيل معذاره
قبل القصيده يوردها نهايتها

وياديرتي ياغناتي وادي ستاره
الديره اللي نبتنا فوق تربتها

نفاع الربيقي

صح لسانك ولا فض فوك

الشاعر الراقي والمشرف القدير

نفاع الربيقي

صح سانك مدد بلا عدد

قصيدة رايعة وصفت فيها بعض ما كان في الماضي والحاضر

واشرت الى الهدر في نعمة الماء
بارك الله فيك وفي فكرك الراقي

وتقبل مروري وتقديري

الاخ الشاعر / نفاع الربيقي

صح لسانك على هذه القصيده

في المعنى والمبنا قصية حاضر

وماضي جزلة ووافيه في الموضوع

الذي طرقته
بيض الله وجهك

المشاركة الأصلية كتبت بواسطة السيف البتار

صح لسانك ولا فض فوك

صح بدنك لاهنت يالغالي

المشاركة الأصلية كتبت بواسطة عبدالله العطافي

الشاعر الراقي والمشرف القدير

نفاع الربيقي

صح سانك مدد بلا عدد

قصيدة رايعة وصفت فيها بعض ما كان في الماضي والحاضر

واشرت الى الهدر في نعمة الماء
بارك الله فيك وفي فكرك الراقي

وتقبل مروري وتقديري

صح بدنك يابو عادل الروعة في حضورك الجزل بارك الله فيك وسلمت

المشاركة الأصلية كتبت بواسطة حمدان بن مقحص

الاخ الشاعر / نفاع الربيقي

صح لسانك على هذه القصيده

في المعنى والمبنا قصية حاضر

وماضي جزلة ووافيه في الموضوع

الذي طرقته
بيض الله وجهك

صح الله بدنك يابو ماجد وماعليك زود وجهك أبيض سلمت يالغالي

صح لسانك
قصيدة جزلة . وانت شاعر جزل
يا ابا ثامر

هههههههههه صح لسانك يابو ثامر والزمن تغير ربي يديم نعمته علينا ويمنعها من الزوال ..

شكراً لك ..

مبدع ..

المشاركة الأصلية كتبت بواسطة عدنان العلوي

صح لسانك
قصيدة جزلة . وانت شاعر جزل
يا ابا ثامر

صح بدنك أخي عدنان ولا عليك زود شرفني حضورك الجزل
تقبل تحيتي