يافهد من شفت زولك بينهم روح خيالي

الشاعر الخلوق .. محمد الحويماني العتيبي

/

يافهد مـن شفـت زولـك بينهـم روح خيالـي
.................................................. ........يقطع بحور الزمان الاولـي عرضـه وطولـه
قمت اهوجـس واتذكـر طيشنـا ذيـك الليالـي
.................................................. ........يـوم كنـا صغـار تحكمنـا بـرأات الطفولـه
يوم كان اقصى طموح لنا ... نروح لبيت خالـي
.................................................. ........وكيف كنا ننتهي من واجب ( الخط وأصولـه )
اذكرك ... يومك تجيني ... كنت انا جالس لحالي
.................................................. ........واتفقد جيـب ثوبـي وألعـن الفقـر وفضولـه
يوم شفتك ... هل دمعي ( يافهد دور ريالـي ؟ )
.................................................. ........وانت تمسح دمعتي بايديك ... وأحساس الرجوله
تقطع ريالك .. تقول ( أمسك ولاتبكي قبالـي )
.................................................. ........وكننا من بعـد هـذا كـل مانبغـى ....ننولـه
وأذكرك يوم انت تلبس غترتـي ...ولا عقالـي
.................................................. ........ثم تجلس في مكان ابـوي ... وعيونـي ذهولـه
والله انـك يافهـد فـي وقتهـا شكلـك خيالـي
.................................................. ........والله انك كل مالديـت .. اقـول الـزول زولـه
يافهـد والخمسـه وعشريـن مـرت ياظلالـي
.................................................. ........قـدر الله والسنيـن بطبعهـا دائــم عجـولـه
يافهد وانت الوحيد اللي يعرف ان ضـاق بالـي
.................................................. ........قبل ماشكي قبل مادمعـي يبـادر فـي هطولـه
يافهد وان شفت دمعي يـوم عرسـك لا تبالـي
.................................................. ........كل مافي الامر فرح ماقدرت انطـق واقولـه !!!