الموروث وحقوقه

ماجيت ابيع الثمين الا على سوقه
وأحرص على نقوته وآصل مواصيله

اما المكسّر ومضروبه ومسروقه
إن مال للسوق يبقى في مكاييله

والتاجر اللي يغش السوق ويبوقه
ما يشتري منه غير أدنى مهابيله

ان قال ماضيه والا وصف معشوقه
أكثر هـــل الذوق ما تبغى مواويـــله

واللي على منهجه معجب بطاروقه
اللحن لــحــنه متى مــــا وده يشيله

إن ما تعدى على الموروث وحقوقه
لـــه كامل الحـــق في وزنـــه وتفعيله

إذا اعجب الناس قالوا صح منطوق
والا على طـــول قالـــوا وش يــغنيله

العرق من مشربه والغصن من سوقه
واذا استوت شجــرته زانـــت محاصيله

والرجل مجهول لين يفك صندوقه
بعــديــن تسهل مضاهاته وتحليله

اما على حسب ظنك فيه ويفوقه
والا تقنّعت عـــن بــاقي تـفاصيله