بلوت وسياق

السلام عليكم ورحمة الله وبركاته


يسعد صباحكم / مساكم بكل خير

متواضعه جديده اضعها بينكم واسال الله ان يوفقنا واياكم لما يحبه ويرضاه




مثل موازين البضايع بالاسواق
اللي تقدر للوزن كل قيمه

اوزن كلامك مع كريمين الاخلاق
واحفظ لسانك عن علوم النميمه

لاتتبع اهل الكذب في زور ونفاق
عواقب اهل الكذب دايم وخيمه

والزم دروب الصمت في كل الاطباق
الصمت للرجال حكمه وشيمه

خذ لك مع اهل الصدق عهده وميثاق
واصدق ترى بالصدق راس الغنيمه

الصدق عده لو على قطع الاعناق
مالك ومال اهل النوايا السقيمه

ترى الحقيقه شمسها تشرق اشراق
حتى ولو بالجو عتمه وغيمه

واحذر غضب روحك ليا خاطرك ضاق
ترى الغضب ساس الندم والجريمه

اكتم غضب روحك بجوفك والاعماق
واحذر ترى الشيطان اخوه ونديمه

لاتنفعل ويضيع حقك وتنساق
خلف الامور اللي تجر الهزيمه

خذ حكمه من الوقت واقرا بالاوراق
تلقى مواقيف الرجال الحكيمه

الوقت ماهو لعب بلوت وسياق
لكن على قدر العمل والعزيمه

واعرف ترى الدنيا توافيق وارزاق
اعمل وعند الله يدين(ن) كريمه

والادمي ما ميزه غير الاخلاق
واللي بدون اخلاق مثل الهشيمه

هذي نصيحه جات من فوق الاوراق
كتبتها لاهل العقول الفهيمه



وسلامتكم


محبكم

ابراهيم السلمي