|
#31
01-17-2013, 02:37 PM
|
||||
|
||||
رد: ديــوان الشاعر:ابراهيم السلمي
احوال الدمعه اللي من سبب كثر الاحزان تجرح عيون اللي بكا في زمانه يبكي من الاحزان باشكال والوان اما بفقد ابوه والا خوانه دمعه على الخدين ياناس هتان واليا تكلم عقدته في لسانه مصدوم من وقته ودمعه بالاعيان بينه وبين الحزن صارت ميانه كم واحد شافه وهو كان فرحان وانهل دمعه وانصدم في مكانه ينسى الفرح وايامه وكل ما كان ويعيش دوامة حزن من عشانه احوال والدنيا على مر الازمان فيها التقلب بين خانه وخاانه تشوف دمع الحزن ودموع من شان من شان غالي غاب واقفى حنانه الدمع واحد وايضا الحزن سيان استغفر الله دام باقي رزانه الشوق مثل الحزن في بعض الاحيان وامر منه احيان حسب المكانه بالذات لا من غاب عن عينك انسان قلبك نبض باسمه ودمعك عشانه
__________________
\7
|
|
#32
04-06-2013, 06:54 AM
|
||||
|
||||
|
رد: ديــوان الشاعر:ابراهيم السلمي
الارصده والهوامير
المال وبيوت الغنى والدنانير والفشخره والمفخره بالريالي والمنصب العالي ولو انه امير حتى من اصحاب السمو المعالي ماهي ترى مقياس بين المناعير اهل الوفا والمرجله والعدالي اقولها وانا ترى مكسبي غير ورثت ورث الطيب جدي وخالي ماني من اهل الارصده والهوامير لكن كسبت الطيب هو راس مالي ما عشت مترف لكن بعيشتي خير واخذت درس من الزمن والليالي عرفت بان المال تاليه للغير واسرفت في صرفه لكن بالحلالي وعرفت بان المال فتنه وتعبير فيه السعاده والشقا والضلالي ياكم غني اموال باخلاقه فقير جيبه ملي بالمال والطيب خالي وياكم فقير اموال باخلاقه كبير معروف باخلاقه مابين الرجالي الفقر ما عاب الوجيه المسافير والمال ما غير رخوم العيالي هذي شواهد ما تبي زود تبرير دونتها بالشعر والراس عالي ماني من اللي يحسبون المخاسير والفضل لله ما عبدت الريالي ان كانها بالمال ياراعي العير استاق عيرك بعد جالك مجالي وان كانها بالطيب بين المساييير حنا بالاول والتوالي توالي ابوي وصاني وانا توي صغير علمني اداب الرجال الثقالي علمني ان الوقت دوره وتغيير نهايته من دون شك الزوالي واليوم من فضله نسوق المشاوير نسجها يم اليمن والشمالي على النقى والعز قافلتي تسير ولا للحمول الا ظهور الجمالي والمال لو عز الردي المعيثير انا كسبت الطيب هو راس مالي
__________________
\7
|
|
#33
04-06-2013, 07:01 AM
|
||||
|
||||
|
رد: ديــوان الشاعر:ابراهيم السلمي
سوق الطيب
الله من ليل شكى من طواريه قلب مع الايام زاد اهتمامه حتى من اسباب الليالي بدا فيه ضيقه عجز عنها يعبر كلامه اليا افتكر بالعالم اللي حواليه قرا على الدنيا واهلها سلامه احد يهايط لاجل لاش مخاويه واحد هياطه لاجل بنت ولثامه لكن انا ماجيت اسوق المشاريه وقتي واعرف الوقت زايد ظلامه به ناس تال الوقت صاروا بهابيه ماميزوا بين الرسن والمسامه عاشوا ترف وقت كثيره بلاويه ضاعت موازينه وخبط نظامه انصحك ياللي طييب الناس تشريه لا تلفت لاهل الحكي والملامه الطيب سوقه يبطي اللاش مايجيه الطيب خامه غير عن كل خامه اهل المراجل فيه تبني مباديه كل مع الاخر يزيد احترامه والمرجله مثل البحر مع موانيه تصعب على راع الزرا والهلامه ارزاق والدنيا توافيق ياهيه والطيب اللي زاد قدره مقامه يقولها اللي فكرته من معانيه شاعر سليم اهل الوفا والزعامه المجد له وان طول الله لياليه ياصل مرام المجد وابعد مرامه
__________________
\7
|
|
#34
04-06-2013, 07:04 AM
|
||||
|
||||
|
رد: ديــوان الشاعر:ابراهيم السلمي
سجن الشقاوه
اشتقت للي نظرته تشفي الروح اللي حداني عنه قسوة زماني اللي ليا جيته وانا كلي جروح يلمني بين الضلوع المحاني سافرت عنه ودمعته تشبه البوح من دمعة عيونه تبعثر كياني نادى يابو خليل من جد بتروح وشلون تتركني في بعدك اعاني صديت غصب وداخلي قلب مجروح قلت العفو هذا النصيب وقواني اقدار والاقدار تكتب على اللوح والحظ في سجن الشقاوه رماني قال انت شهم وفيك نخوه وطحطوح تكفى تجمل ياعزيز المكاني جاوبت خلي وازرق الدمع مسفوح باهات يسمعها بعيدن وداني راع الهوى بين المخاليق مفضوح وانا على الفرقا زماني حداني ماعاد في لقياك خيره ومصلوح مادام ربي جابلك شخص ثاني هذا النصيب وحكمة الله باللوح اباك وانته ياحبيبي تباني لكن قدرنا فرق القلب والروح شكواي لله ياظروف الزماني
__________________
\7
|
|
#35
04-06-2013, 07:06 AM
|
||||
|
||||
|
رد: ديــوان الشاعر:ابراهيم السلمي
سعر الدجاجه
البارحه والفكر مثل الهبايب تصافق اشواره وعكر مزاجه واخذت افكر في زمان العجايب اللي مع الايام زاد اعوجاجه اهب ياوقت يجيب الغرايب منه الرضيع يشيب حتى حجاجه والمشكله نعرف جميع السبايب مرض خطير ولا عرفنا علاجه اسبابه التجار روس الزلايب قوم على جمع الدراهم تواجه بالمهزله والنصب صاروا حبايب تجار والتاجر يدور خراجه ترفع لنا الاسعار غدر ونهايب الله ولا تاجر يجي في حراجه سعر الطماطم زاد وبلا رقايب والجبن والالبان زادوا نتاجه الشعب قالوا نتخذ راي صايب نقاطع الغالي وتهدا العجاجه واللي عليهم زاد كل المصايب حاجه وحيده لكن اهم حاجه سعر الدجاجه صار مثل الضرايب والعيش ما يقوى بدون الدجاجه وان قاطعوها مالهم غير شايب يبيع بالحري ومغلي نعاجه والشعب يستنكر وزاد الطلايب الا الدجاجه عندنا الذ حاجه
__________________
\7
|
|
#36
04-06-2013, 07:08 AM
|
||||
|
||||
|
رد: ديــوان الشاعر:ابراهيم السلمي
رمز الامان
في ذمتك قلي وش اقول يافلان والحزن في قلبي بنا له مدينه العام نبكي حزن في موت سلطان واليوم كل الدار والله حزينه من بعد ما جابوا خبر عن كحيلان اميرنا راع العلوم الثمينه نايف ولي العهد رمز للامان راع الخصال النادره والرزينه قالوا توفى وهلت الدمع الاعيان ما فيه عاقل ما اذرفت دمع عينه تبكيك يانايف عمارات واوطان ويبكيك شعب خايف من سنينه انت الذي بعد الله ارسيت الامان بسياستك يا نايف الدار امينه كم طوعت هيبتك عاصي وشيطان كم رجعت حكمتك غااوي لدينه يمناك سطوتها كما السيف شامان كم فتنة من فعلك اضحت دفينه الدار عقبك تلبس ثياب الاحزان والشعب من فرقاك ربي يعينه عزي لدارِ مابها مثلك انسان يرسي قواعدها على امن وسكينه يارب ياللي بيدك تدبير الاكوان ياوالي الاقدار زينه وشينه تجزل صبر عبدالله فموت الاخوان وتعوضه يالله بمسااعدينه احمد وزير الداخليه وسلمان جنود تحت امره وسطوة يمينه صحيح نايف مات من عقب سلطان ماتوا لكن تبقى الفعايل مبينه افعالهم تبقى على مر الازمان يشهد لها مجد العرب في جبينه ماتوا لكن الدار تبقى بالامان يافرحة العدوان مووتي حزينه سلطان نايف نايف اليوم سلمان والدار بامر الله بايادي اميينه
__________________
\7
|
|
#37
04-06-2013, 07:17 AM
|
||||
|
||||
|
رد: ديــوان الشاعر:ابراهيم السلمي
ياعيون ناعسه ياشفتين
قالها ركان من قبل المنام العسل يامكثر انواعه ذحين احسنه ذاك الذي تحت اللثام ياعيون ناعسه ياشفتين من يذوقه يدمنه ولايلام ابك هذا ادمان كل المسلمين العيون تودي الولهان شام لين يخطي باليسار وباليمين لااطرقت نظراتها مثل السهام نظرة الموت الحمر في كل عين والشفايف ياسلام وياسلام ريقها يكفيك عن كل السنين ماتقول الا خمر لا بالحرام انها اخطر منه عند المدمنين هيه ياراع اللثام اخذ الكلام وارحم اللي في هواكم ذابلين ماتعرف ان الهوى سحر وهيام راس ماله كلها اهات وانين ماتعرف ان الهوى فيه الالام والجروح النازفه في كل حين الهوى معناته انك ماتنام ضايع بدنياك وايامك تشين عايش بدنياك طلق ولا تضام حر لكن داخلك قلب سجين بانهي الموضوع يامال الرحام واختم حروف القصيد بكلمتين البلاوي كلها يام اللثام ياعيون ناعسه يا شفتين
__________________
\7
|
|
#38
09-03-2013, 06:02 PM
|
||||
|
||||
|
رد: ديــوان الشاعر:ابراهيم السلمي
سلة الحلوى يافرحة الاطفال لا ذاعوا العيد ياسلة الحلوى وريح المباخر ياريحة العطر المركز على الغيد يالمنظر اللي يجمع احلى المفاخر انا ترى شوقي مع العيد بيزيد ياحلمي اللي في زماني تباخر دموعكم فرحه وانا الحزن الاكيد اللي دموعه مثل نضح البواخر صبح المعايد حالي يزيد تعقيد والليل يمضي بالسهر يالمشاخر ليا ذكرت ايامنا والمواعيد واحلى الهدايا خاتم وعطر فاخر احاول اسلي ضميري بترديد هذاك شي واليوم انا شي اخر واليوم مر العيد دمع وتناهيد من عقب كان الضحك واسلوب ساخر خلاص يالعيد اقف عني وش يفيد لا صار شوقي فيك جمر المباخر ويافرحة الاطفال لا ذاعوا العيد العيد فرحه عند مثلي تباخر
__________________
\7
|
|
#39
06-13-2016, 10:25 PM
|
||||
|
||||
|
رد: ديــوان الشاعر:ابراهيم السلمي
راع الوفا
ياللي تحسب الطيب سلعة في دكان راجع حساباتك وشوف الخزانه وان كان شفت الطيب يشرى للانسان خذ شيك للرديان عندي ضمانه اقولها حجة ولا احتاج برهان اللي يعرف الحق ميز رهانه الطيب سلعة ما تقدر بالاثمان في سوقها خسران راع الخيانه يا هيه ما للطيب وجهه وعنوان ولا تحسب الطيب يعرف زمانه الطيب فطره بالبشر كل الازمان والفطره الاخرى تراها اللعانه الناس مختلفه بها كل الالوان مثل اختلاف اشكالهم والديانه تلقى العرب صنفين طيب ورديان سنة حياه وكل شي وكيانه راع الوفا يلقى الوفا وين ما كان والا الردى راعيه ما له مكانه راع الوفا يحسب من طوال الايمان اهل الكرم والجود واهل الرزانه والا الردى راعيه بالوقت خسران ولا يجمل منطقه وإتزانه تعامل مع الناس باخلاق واحسان ما هو على حسب الشكل والميانه هذا كلام الصدق من قلب ولسان والرجل يعرف معدنه من لسانه يقولها شاعر هل العز والشان شاعر سليم اهل الفخر والرزانه
__________________
\7
|
|
#40
11-04-2016, 05:47 PM
|
||||
|
||||
|
رد: ديــوان الشاعر:ابراهيم السلمي
دروس وتجاريب
تعامل مع الناس بالطيب وتطيب درب الوفا والطيب ما به نقاده ولا يهمك راعي الكذب والريب هذاك ابو وجهين كذبه ما فاده دايم ردي المعرفه ظنه يخيب حتى ولو انه كما ابو عراده بعض العرب في منطقه كنه الذيب والا ليا جات المواقف جراده ولا يعرف يعز نفسه عن العيب راع الردا علم الردا فيه عاده عنهم ترفع واحتزم للمواجيب ترى الفتى بالعز ياصل مراده واعرف ترى الدنيا حظوظ ومكاتيب خلك على الدنيا قوي الاراده اسرار قلبك صونها بالمحاديب واحفظ لسانك عن علوم البلاده وليا سترك الله فلا تكشف الغيب الستر من عند الولي لعباده خذ درس من كل العبر والتجاريب واحفظ صلاتك هي عمود العباده وان كان للاجواد عندك مطاليب الحق لاهل الحق واجب سداده وليا نصاك الضيف زين التراحيب للضيف ثم الكيف جهز قناده واحفظ حقوق الجار بالعز والطيب الجار قبل الدار يثبت وتاده خلك لربعك درع جنب وغطا جيب حتى من ربوعك تجيك الاشاده ولا تنكر المعروف لو بالاجانيب الطيب والطَيب يا ما اكثر بلاده على العدا خلك عطيب المضاريب لا خير في رجل ما يقدح زناده هذي وصية ما عليها مناديب دونتها من راس كله جلاده والوقت يعطينا دروس وتجاريب والمسعد اللي درس الايام فاده
__________________
\7
|
«
الموضوع السابق
|
الموضوع التالي
»
العرض العادي
تعليمات المشاركة
|
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك
BB code is متاحة
الابتسامات متاحة
كود [IMG] متاحة
كود HTML معطلة
|
|
|
الساعة الآن 02:48 PM.
