ديوان الشاعر / عبــــدالله الصــــالحي

صوت مدوي

[poem=font=",6,blue,normal,normal" bkcolor="transparent" bkimage="" border="none,4," type=1 line=1 align=center use=sp num="0,black""]
أنا شفت لك في عالي الجو تحليق=ياطير وش جابك تحلق بجوّي
إن كان جابك لي عطاش المعاليق=أبشر يبي يرويك سحاب نوّي
وإن جيتني تبغى صداقة مطاليق=يبدد ظلام الليل لك نور ضوّي
وإن جيت ليه مثل باق المخاليق=اللي جمعهم لي صوتٍ مدوّي
طاحوا بعضهم فالشراك المزاليق=اللي نصبها فِكر واحد مغوّي
تكفى لاتمشي دربٍ الاّ بك يليق=تراك ولْد اللي يقول ويسوّي
وبعض المعاني ماتبي منك تعليق=يكفيك فيها اللي عليها مثوّي
ومن يفتح أبوابٍ على الشر مغاليق=واجب عليه يسرح اللي يضوّي
[/poem]

يا أبيـات شـعـري

يا أبيات شعري لا وصلتي صاحبي لاتزعجيـه

إختـاري الـوقت المناسب لو عليك الوقت طـال

واحفضـي لـه هيبتـه بالحيـل وانتـي تهـرجيـه

واختصـري الهـرجه معه تراه مايحب الجـدال

قـولي حبيبـك مـن بعـد فرقـاك كثرو معالجيـه

بـعـد الـحـيــاه الاولــه تـبــدلـت حـالـه بحــال

لـكــن طـبـعـه مـاتغـيّر فـيـه حـزم لمحرجيــه

وارسـلـنـي أسـلـم عـليـك وابـلغــك تـراه قــال

أبعـذرك في زيارتي إن كان لـك عـذرٍ وجيــه

لـكــن مـانـي عـاذرك لـو تعتـذر عـن السـؤال

مـدام مـن قـدر ظـروفـك أنت ماتقــدر تـجـيــه

مـن الادب تســأل عـن احـواله ولـو بالاتصال

وانكان قصدك بالجـفا أخضع لمثـلك وارتجيـه

هـذا تـراه المسـتحيـل اللـي علـى مثـلي محــال

وانته تعرفني من الرجال اللي يحفضون الوجيه

مايـنـحنـي راسـي يكـود لخـالقـي راع الجــلال

ياسعود

[poem=font=",6,darkblue,normal,normal" bkcolor="transparent" bkimage="" border="solid,4,chocolate" type=1 line=1 align=center use=sp num="0,black""]
ياسعود ماني للمواجيب نسّاي=ولا بتصنّع فالوجوب اعتذاري
ولايضيق بي الصبر عن جرح يمناي=لو جاملت يمناي حضرة يساري
عسى العوض ياقلب في وقتك الجاي=إن كان اباخذ من يديني بثاري
وبعد استوت لي وجابها الله بمرماي=عييت لاكوّي يديني بناري
حشمتها لا يسومها نار مكواي=لوجرحها فالقلب له دم جاري
إيدي لو كلّت ولا ردت عداي=أقلّها تضفي عليه إزاري
هذا هو نهجي وطبعي ومبداي=اصبر على زلة يديني واداري
وليا بلاني الله بمن يبحث خفاي=تركت درب اللي على البحث ضاري
ورفعت عن بير الضمأ الدلو ورشاي=ويممت وجهي للسحاب الغزاري
ومن حدني بشين فعله على اقصاي=خليته يرد السلف والعواري
عساك ماغريت قصدي ومعناي=ياتاجرٍ فالسوق بايع وشاري
وليا جهلت ارجع على درب مسراي=تلقى لقولي فالحقيقه مواري
[/poem]

بــــــــــــــــوح شـــــــــــــــــاعر

[poem=font=",6,darkblue,normal,normal" bkcolor="transparent" bkimage="" border="none,4," type=1 line=1 align=center use=sp num="0,black""]
في ليلةٍ قمرا بها الجو دافي=والكيف قندته على شبة النار
في حزة اللي من سلى الهم غافي=أطلقت أنا بيدي عنان الافكار
وراحت تجوب بكل قفر وفيافي=وجتني بذكر اللي له سنين مازار
قالت لقيته فالسنين العجافي=اللي تسميها لك اليوم تذكار
قلت ياهلا باللي على الفكر لافي=ضيفٍ ولو ماشوفه بعين الإبصار
في ليلةٍ حلوه حلاها خرافي=أشب له نار الفكر وانظم اشعار
اليوم في وقتٍ به الامن ظافي=راحت بفضل الله معه كل الاخطار
كلٍ يقول أنا الوحيد السنافي=اللي يصدّ بمفرده جيش جرار
والناس عنده ماعليها حسافي=من خالفه بالراي مثل العدو صار
في نظرته كل الشواطي مرافي=وكل الشجر ينبت رياحين وأزهار
يصيح لو يمشي على الارض حافي=ويدس راسه لو يجي عج وغبار
ما أطلقت أنا الاحكام هذي جزافي=جربت كل الناس صافي وغدّار
واعرف حزة موقفي وإنصرافي=وعلى مقادير الزمن دوم صبّار
واقنع ولو رزقي بيومي كفافي=واموت انا ماتبع مقفي بالانظار
ولا زعل ليا طار القطا من ضفافي=يرده لي صوت الثميدي ليا ثار
ماقل دل ولو ماشاب قافي =أخذ الكلام اللي تحطه لك شعار
إحذر يجي قولك لفعلك منافي=ويطيح قدرك عند وافين الاشبار
ولاكل وقتك يارفيقي عوافي=ترى الحلا دايم يجي بعده امرار
ودّعت ضيفي بعد ماقال كافي=غمرتني بنُصحك بعد كنت محتار
وصلاة ربي اللي عليها اعترافي=على محمد خير من بالقدم سار

[/poem]

الســــــــــجين

[poem=font=",6,darkblue,normal,normal" bkcolor="transparent" bkimage="" border="none,4," type=1 line=1 align=center use=sp num="0,black""]
سلام خالي من التكلف والإزعاج=لأهل القلوب الطيّبه والنقيّه
اللي لهم فالطيب مبدأ ومنهاج=ولاتقبل من الظلم ربع الوقيّه
وانا تراني للوفي عِدّ هدّاج=ولاتغرني نظرات عينٍ شقيّه
ودي أوضح علم في خافقي لاج=واثبت لك بحسن النوايا أسبقيّه
لكن مرسولي تعرض للاحراج=حولت دربه عن دروب البقيّه
إن كان به خِله يا.......... ويحتاج=شئٍ من التوجيه يرفع رقيّه
وإن كان من نوره طفى نور وهاج=ماهي عداله منك ترفض بقيّه
ومن بعدها قفلت بابك بمزلاج=وانا أتحرى رد نفسٍ تقيّه
اليوم في عصر العداله والانتاج=راحت عصور السيف والبندقيّه
راع الخطأ مايجلس برجه العاج=دام السبايب واضحه ومنطقيّه
والمسلمين اللي بطنجه وقرطاج=أخوان لاهل الشام واللاذقيّه
خل السجين يشوف لحظات الافراج=ويلقى الحبيب اللي تمنى لقيّه
[/poem]

عــــــــــــــذب الشـــــــــــعر

[poem=font=",6,darkblue,normal,normal" bkcolor="transparent" bkimage="" border="none,4," type=1 line=1 align=center use=sp num="0,black""]
هات القلم ليه وقربني البوك=مدام عذب الشعر هبت هبايبه
نبغى من بيوت الشعر قاف مسبوك=يعدها اللي قالها من كسايبه
كنه خرز مرجان منظوم بسلوك=والاّ خرز لؤلؤ من الغوص جايبه
ينصى الكريم اللي به السعد مشروك=حلال قيد اللي كثيره نشايبه
أعطيه علمٍ واضحٍ مابه شكوك=حالي مع الايام زادت صوايبه
القلب به من صالي الوقت داكوك=علاه نادى حاضر الهم غايبه
والنفس يشلعها كما يابس الشوك=مما غشاها من الزمان ومصايبه
ناسٍ تعاديني بلا دم مسفوك=عاقلهم اللي بان ليه حضايبه
على صعيبات المواقف يحدوك=عزي لمن همه يجي من قرايبه
ليه عليهم درب واضح ومسلوك=نفسي على ممشاه بالحيل شايبه
لكن دونه باب من عام مصكوك=ماقدرت العقّال تعرف سبايبه
ياصاح عطني راي حازم ومحبوك=نظرتك دايم فالملمات صايبه
حتى يجينا يوم ونقول مبروك=يصفي لنا مشروب كثرة شوايبه
والشكر لاهل الطيب ماهو بمتروك=بعد الكريم اللي جزيله وهايبه
[/poem]

قطف السنابل

شوفـتــك صـارت صـدفـه بغـير ميعـاد
مـن بـعــد كـنــا كـل يـــوم نـتـقــابــــل

لاقـلـت ابشـوفـك ولـو وقـت الاعـيــاد
أمطـرتني مـن جــاهـز العــذر وابـــل

لو كـنـت في ماتـقـول ياصاحبي جـــاد
تـقــدر تغــيـّر شـئ لـو مـاأنـت قـابــل

وايــن الـوفــا ياصـاح والمـلح والــزاد
لـيــه الـغــلا فـي قـلـبـك الـيـوم ذابـــل

سـقـيـت زرع الـود من دمـع الاســهاد
وانـتـه حـصـدتـه قـبـل قطـف السـنابـل

والـعـذر صـار اليـوم فـي يـديّـه أصفـاد
وصـادق مـحـبـتـكـم فـي قـلبـي قـنـابـل

دمــرتـنـي ياصـاحـبـي بطبعـك الحــاد
مـثـل مـادمـّر شـعـب الافـغـان كـابـــل

مــــــــــــوجـــــــــــة غضــــــــــــب






يـقــين فـعـلـك زال بـه كـل شـكـي
ولاعـاد عنـدي فيك ذرّه من الشـك

هـجــرت قـلـبٍ فـيـه حـبـك متـكـي
وأخـلـصـت فـي حبك لقلبٍ يغـشـك

خـــلاص لاتـكــثر عـلـي التشـكـي
رجّــع عـصـافــير المحـبـه لعشـك

وخـلّ المـكـان الـلـي جمعنـا يحـكي
بعـلمـك غـراب البـين لا جـا يبشـك

شفنـي عشـان أنسـاك غـيّرت نـكـي
ومـوجـة غضـب أرسلتها لك تقـشـك

كــرامـتـي لا جــات عـلـى المحـكّـي
لـو كـنـت لـي الـروح والـلـه لطشـك

أحـــــرجـتـنــي

[poem=font=",6,darkblue,normal,normal" bkcolor="transparent" bkimage="" border="none,4," type=1 line=1 align=center use=sp num="0,black""]
أحرجتني وانا من الوقت محرج=لا قلت هانت زادني وقتي إحراج
الى متى والهم فالقلب مسرج=كن الهموم حيام والقلب هدّاج
سنين مرت بي وأنا أقول تفرج=ودربي ظلامٍ دامسٍ مابه سراج
ياربي اكتب لي من الضيق مخرج=وقدّر لهمٍ داخل القلب بافراج
لين القدم مع أهل الخير تدرج=واجعل لي الطيب سجيه ومنهاج
وأعوذ بك من كيد الاعمى والاعرج=ومن شر كلمة كل شامت وهراج
[/poem]

العفو عند المقدره

[poem=font=",6,darkblue,normal,normal" bkcolor="transparent" bkimage="" border="none,4," type=1 line=1 align=center use=sp num="0,black""]
رقابي الهوجاس ضلعٍ عاليات رجومه=دونه الدرب العضي ومن وراه الحرّه
وسهرت انا واياه ليلٍ باديات نجومه=ابتدي لف الشريط ولا انتهيت افرّه
اتفكر فالزمان اللي تهب سمومه=تلفح الرجل الشديد بحرها وتغرّه
لو مقادير العرب وارزاقها مقسومه=الحسد يطغى على الحاسد ويظهر شرّه
واتفكر فالعميل اللي صحى من نومه=بعد ماشاف الحقايق في منامه مرّه
ضاقت الدنيا عليه وقام يرمي سهومه=يرتجي بعض العرب تقول لله درّه
حدثتني نفسي بردعه وصد هجومه=وارسل الغاره بعد غاره واعيد الكرّه
قلت يانفسي تأنّي ماش بحر اعومه=ولاش عينٍ تستحق الملح فيها أذرّه
من تكلم للملا بالهرجه المخصومه=يحتقر من هرجته لو كان عاقل مرّه
ولا شرب من يحمل الماء بقربةٍ مخرومه=ولا نبي نزيد الضمأ فوقه بكسر الجرّه
ابشملك ياصاحبي من عفوي بديمومه=وانتبه لاتعيدها من بعد هذي المرّه
دام ماتقدر تصادم فالزمان قرومه=لاتعرّض نفسك لبرد الزمان وحرّه
[/poem]