العاقل

العاقل اللي نظرته نظرة الذيب
ماغرته دنياوكثر التهاويل

عقله وتفكيره في يوم المحاسيب
يومه وليله ذكرربه وتهليل

مما تشوف العين في راسه الشيب
شاف الفتن والغربله والعراقيل

وحافظ على دينه من الشك والريب
ويخاف يوم فيه جني المحاصيل

يعمل ليوم يوزعن المكاتيب
وتبان كل اعمالنا بالتفاصيل

يخاف يوم يولعن المشاهيب
من نار سوداء كنها ظلمة الليل

راضي برزقا مايجي بالمشاعيب
الرزق مكتوبا ولافيه تحويل

لن جاه هما رده لعالم الغيب
ربا رحيم يبدل الحال تبديل

وافي ويظهر عند بذل المواجيب
ويقدم الجزلات من فطح الحيل

خبرة سنينه علمته التجاريب
يازن كلامه مثل وزن المكاييل

يعامل اللي من حواليه بالطيب
يكمل وجوب الضيف والجار تكميل

ربى عيال مفتلين الاشانيب
واخواتهم قوم الغطاء والمراييل

يتصدرالمجلس ولاينطق العيب
ويعطر المجلس بحسن الاقاويل

ماقول كامل ماتجيه العذاريب
لاكن عارف يازن الكيل والميل

هذا كما البلسم على الجرح ويطيب
يستاهل التكميل والبن والهيل

وختامها صلوصلاة(ن) بترتيب
على رسول الخير جيلا بعد جيل

صح لسانك ياسيف الشعر ..

لاهنت مبدع دائماً ..

تحيتيـ ..

الشاعر الجزل سيف القادري
صح الله لسانك وأعتلا شانك قصيده هادفه ونصيحه جميله بيض الله وجهك

شاعر جميل ياسيف الصادري

صح السانك وسلم بنانك

صح لسانك ياسيف

قصيدة جزلة من جزل

لاعدمنااااك

صح لسانك . وسلم بنانك

مبدع ومتميز في الطرح كعادتك . لله درك

تحياتي

شكرا للجميع

والاروع مروركم جميع

صح لسانك قصيدة مليئة بالنصح والحكم..

اعجبني مطلع القصيدة ..
العاقل اللي نظرته نظرة الذيب ..الله الله

صح لسانك ولا فض فوك قصيدة جميلة وجزلة

صح لسانك يا سيف الصادري

جزل دائماً