مبطي عن علوم المطر

جعل السحاب الي قنوفه مراميس
يمطر على روحي ويسقي ضماها

ويبل ريق الي طوته الهواجيس
يابعد رغبات النفوس وهواها

مبطي من علوم المطر والعواسيس
والشده لدار بعيد مداها

والبرد والرقده بخمسة برانيس
ياحي طاريها ولذة دفاها

لو يختلف وقتي بشتى المقاييس
بداوتي هي هي في محتواها

يلعنك ياحظي ويلعنك ياابليس
هيضت روحي لين جاها بلاها

مشاعري من عام قدها قرانيس
حامت وشبعت ووصلت منتهاها

ليت البشر مايجرحون الاحاسيس
او ليت طيب الناس يغلب رداها

تعبت من شوف الردي فيس تو فيس
واشتقت لقلوب الرجال ونقاها

اضيق من شوف المدن والدواعيس
واقول ياحي السعه ماحلاها

ودي ادوج بخايع مابعد ديس
قد مره سباع تدور عشاها

البر في عيوني من الضيق تنفيس
لروح من هم السنين وغثاها

مشراف حزم غيرته التضاريس
يذكر عيون الغرام بلقاها

لاطرفت شمس العصر ياهل العيس
شب الجروم الي يدلك سناها

مشتاق لاجواء الشتا والنسانيس
والسيل لاغطى البقاع وكساها

واجمل عطر يسوى عطورات باريس
ريح الحطب بثيابنا لاملاها

صح لسان الشاعر

وشكرا على النقل لاعدم

صح لسانه وتصوير ووصف رائع ..

بتجيك علوم الأمطار إن شاءالله على دخول الشتاء الأيام القادمة ..

سلمت يمينك ..

تحيتيـ ..