كبوه جواد ~ لفهد بن مساعد ~

السلام عليكم ورحمه الله وبركاته


اخترت لكم هالقصيده للمتألق الشاعر فهد بن مساعد

... اتمنى انها تعجبكم ...



صعــب لامنـّـك فشلـت .. وصعــب لامنـك لقيـت
إن مـن يكــره نجاحـك .. يــدري إنـك مانجحـت


أمس ضقت .. ورحت أقلّب ذكرياتي .. وأنتهيـت
عند صورة طفل صوته مثل صوتـي لاانجرحـت


وش مثـــل لا والله إلا هـــذا أنـا يـــوم ابتــديـت
أنطــق حــروف ٍ تلعثـم فـي لســانـي لا أنمدحـت


هــذا انـا يـــوم الحيـاه فنظرتـي عشــريـن بيـت
ومسجدين ومدرسه من طين كم فيها اصطبحت


هذا أنا وأصبحت اتمتم : " هذا انا "حتى بغيت
أختنق .. بس القـــدر عيّا على موتي .. وطحـت


وصاح صوت الطفل فيني:أنت من وين ارتميت
قلت أنا المستقبل اللي فيـه كـم همـت وطمحـت


أمـس كنت أبيك تكبـر .. بــس والله لـو دريــت
أني اللي عشـت لأجلـه مــتّ عنـدك وأسترحـت


لو دريت إن الزمان يجــرّ رجلـي .. مـا عديـت
ولو دريت إن البحور بـلا مـوانـي .. ماسبحـت


كان دربك لي طويـل .. وكــل ماشفتــك هـويـت
قلت لك : كبوة جواد .. وما كبيـت إلا وجمحـت


ليـه تسمعنــي وتمشــي ؟! آه ليتـك مـا مشيــت
و آه ليتك مـن كثـــر عثـــرات الأيـام أنتصحـت


ضاعت احلامي .. وظلّ الحزن فيني .. وأهتديت
للطــريق اللـي يودينــي علـى دمعــي .. ورحـت


يالحــزن .. ليتك مثــل دمعــي وتنـــزل لا رقيـت
بس أعرفك .. لومسحت الدمع تبقى ما انمسحت


كان حلمـي .. في وجــود إنســان يبكـي لا بكيـت
وصار حلمي .. في وجـود إنسان يفرح لا فرحـت


كنت أشـوف الناس مثلي كل مـا جعـت وضميـت
مادريت إن الأوادم نـاس فــــوق .. ونـاس تحـت


آه يـاأول ذكــرياتـي .. خذنـــي فحضنـك نسـيـت
لأسألك عن وجه ابوي اللي معـه يامـا سرحـت


خذنــي فحضنك أبغفــى .. يـاه مبطـــي ماغفيـت
وإن لمحت دموع عيني .. سـو نفسـك مالمحـت


خذني فحضنك .. وبعثر في جروحي وإن قضيـت
هزّ لي كتفي .. وقل لي : عيب تبكي لو سمحـت


إضحك .. وعلّم زماني من أنا .. ومن وين جيـت
طــقّ باب الحــزن .. واصـرخ فـيّ لامنـي فتحـت


و ضمّنــي يمّـك .. وكمّـل ضحكتــك لامــن بكيـت
ودي أذكـــر كيـف كـانـت ضحكتـي لامـن فــرحـت

المشرف المميز / عبدالمحسن السلمي

نقل رائع لقصيده رائعه لشاعر عملاق سلمت أخوي على النقل

ويعطيك ألف عافيه ... دمت مميز

\7

إن مـن يكــره نجاحـك .. يــدري إنـك مانجحـت


نقل مميز لقصيدة رائعة لشاعر كبير.

من القلب: شكراً عبدالمحسن

بورك فيك أخي عبدالمحسن السلمي
و سلم ذوقك
تحياتي

انتقى رائع وذوق مميز

الاخ عبد المحسن


يعطيك العافيه على هذه القصيده لشاعر الكبير فهد بن مساعد


تحياتي لك

هلا..بكـل إللي نورواا صفحتي المتواضعة ..
ونثروا فيها أريج كلماتهم .. وعذب أحاسيسهم^_^

سعدت بهذاالتواجد .. وروعة المرور..
ماننحرم من هذا المرور الرائع..
كل الود